अट्ठावयम्मि उसहो चंपाए वासुपुज्ज-जिणणाहो ।
उज्जंते णेमि-जिणो पावाए णिव्वुदो महावीरो ।।१।।
वीसं तु जिण-वरिंदा अमरासुर-वंदिदा धुद-किलेसा ।
सम्मेदे गिरि-सिहरे णिव्वाण गया णमो तेसिं ।।२।।
वरदत्तो य वरङ्गो सायरदत्तो य तारवरणयरे ।
आहुट्ठयकोडीओ णिव्वाण गया णमो तेसिं ।।३।।
णेमि-सामी पज्जुण्णो संबुकुमारो तहेव अणिरुद्धो ।
वाहत्तरि-कोडीओ उज्जंते सत्त-सया वंदे ।।४।।
राम-सुआ बिण्णि जणा लाड-णरिंदाणपंचकोडिओ ।
पावाए गिरि-सिहरे णिव्वाण गया णमो तेसिं ।।५।।
पण्डु-सुआ तिण्णि जणा दविड-णरिंदाण अट्ठ कोडीओ ।
सत्तुञ्जय-गिरिसिहरे णिव्वाण गया णमो तेसिं ।।६।।
सत्तेव य बलभद्दा जदुव-णरिंदाण अट्ठ कोडीओ ।
गजपन्थे गिरि-सिहरे णिव्वाण गया णमो तेसिं ।।७।।
राम-हणू सुग्गीवो गवय गवक्खो य णील महणीलो ।
णवणवदी कोडीओ तुङ्गीगिरि-णिव्वुदे वन्दे ।।८।।
अङ्गाणंगकुमारा विक्खा-पञ्चद्ध-कोडि-रिसिसहिया ।
सुवण्णगिरि-मत्थयत्थे णिव्वाण गया णमो तेसिं ।।९।।
दहमुह-रायस्स सुआ कोडी-पञ्चद्ध-मुणिवरें सहिया ।
रेवा-उहयम्मि तीरे णिव्वाण गया णमो तेसिं ।।१०।।
रेवा-णइए तीरे पच्छिम-भायम्मि सिद्धवर-कूडे ।
दो चक्की दह कप्पे आहुट्ठय-कोडि-णिव्वुदे वन्दे ।।११।।
वडवाणी-वर-णयरे दक्खिण-भायम्मि चूलगिरि-सिहरे ।
इंदजिय-कुम्भयण्णो णिव्वाण गया णमो तेसिं ।।१२।।
पावागिरि-वर-सिहरे सुवण्णभद्दाइ-मुणिवरा चउरो ।
चलणा-णई-तडग्गे णिव्वाण गया णमो तेसिं ।।१३।।
फलहोडी-वर-गामे पच्छिम-भायम्मि दोणगिरि-सिहरे ।
गुरुदत्ताइ-मुणिंदा णिव्वाण गया णमो तेसिं ।।१४।।
णायकुमार-मुणिंदा बालि महाबालि चेव अज्झेया ।
अट्ठावय-गिरि-सिहरे णिव्वाण गया णमो तेसिं ।।१५।।
अच्चलपुर-वर-णयरे ईसाणभाए मेढगिरि-सिहरे ।
आहुट्ठय-कोडीओ णिव्वाण गया णमो तेसिं ।।१६।।
वंसत्थल-वण-णियरे पच्छिम-भायम्मि कुन्थुगिरि-सिहरे ।
कुल-देसभूसण-मुणी णिव्वाण गया णमो तेसिं ।।१७।।
जसरह-रायस्स सुआ पञ्चसया कलिंग-देसम्मि ।
कोडिसिलाए कोडि-मुणी णिव्वाण गया णमो तेसिं ।।१८।।
पासस्स समवसरणे गुरुदत्त-वरदत्त-पञ्च-रिसिपमुहा ।
रिस्सिंदे गिरिसिहरे णिव्वाण गया णमो तेसिं ।।१९।।
जे जिणु जित्थु तत्था जे दु गया णिव्वुदिं परमं ।
ते वंदामि य णिच्चं तिरयण-सुद्धो णमंसामि ।।२०।।
सेसाणं तु रिसीणं णिव्वाणं जम्मि जम्मि ठाणम्मि ।
ते हं वन्दे सव्वे दुक्खक्खय-कारणट्ठाए ।।२१।।
स्रोत: बृहज्जिनवाणी संग्रह (विशेष पूजन खण्ड), पृष्ठ २७५ से २७६