निर्वाणकाण्ड (प्राकृत) | Nirvankand (Prakrit)

निर्वाणकाण्ड (प्राकृत)

अट्ठावयम्मि उसहो चंपाए वासुपुज्ज-जिणणाहो।
उज्जंते णेमि-जिणो पावाए णिव्वुदो महावीरो॥१॥

वीसं तु जिण-वरिंदा अमरासुर-वंदिदा धुद-किलेसा।
सम्मेदे गिरि-सिहरे णिव्वाण गया णमो तेसिं॥२॥

वरदत्तो य वरङ्गो सायरदत्तो य तारवरणयरे।
आहुट्ठयकोडीओ णिव्वाण गया णमो तेसिं॥३॥

णेमि-सामी पज्जुण्णो संबुकुमारो तहेव अणिरुद्धो।
वाहत्तरि-कोडीओ उज्जंते सत्त-सया वंदे॥४॥

राम-सुआ बिण्णि जणा लाड-णरिंदाणपंचकोडिओ।
पावाए गिरि-सिहरे णिव्वाण गया णमो तेसिं॥५॥

पण्डु-सुआ तिण्णि जणा दविड-णरिंदाण अट्ठ कोडीओ।
सत्तुञ्जय-गिरिसिहरे णिव्वाण गया णमो तेसिं॥६॥

सत्तेव य बलभद्दा जदुव-णरिंदाण अट्ठ कोडीओ।
गजपन्थे गिरि-सिहरे णिव्वाण गया णमो तेसिं॥७॥

राम-हणू सुग्गीवो गवय गवक्खो य णील महणीलो।
णवणवदी कोडीओ तुङ्गीगिरि-णिव्वुदे वन्दे॥८॥

अङ्गाणंगकुमारा विक्खा-पञ्चद्ध-कोडि-रिसिसहिया।
सुवण्णगिरि-मत्थयत्थे णिव्वाण गया णमो तेसिं॥९॥

दहमुह-रायस्स सुआ कोडी-पञ्चद्ध-मुणिवरें सहिया।
रेवा-उहयम्मि तीरे णिव्वाण गया णमो तेसिं॥१०॥

रेवा-णइए तीरे पच्छिम-भायम्मि सिद्धवर-कूडे।
दो चक्की दह कप्पे आहुट्ठय-कोडि-णिव्वुदे वन्दे॥११॥

वडवाणी-वर-णयरे दक्खिण-भायम्मि चूलगिरि-सिहरे।
इंदजिय-कुम्भयण्णो णिव्वाण गया णमो तेसिं॥१२॥

पावागिरि-वर-सिहरे सुवण्णभद्दाइ-मुणिवरा चउरो।
चलणा-णई-तडग्गे णिव्वाण गया णमो तेसिं॥१३॥

फलहोडी-वर-गामे पच्छिम-भायम्मि दोणगिरि-सिहरे।
गुरुदत्ताइ-मुणिंदा णिव्वाण गया णमो तेसिं॥१४॥

णायकुमार-मुणिंदा बालि महाबालि चेव अज्झेया।
अट्ठावय-गिरि-सिहरे णिव्वाण गया णमो तेसिं॥१५॥

अच्चलपुर-वर-णयरे ईसाणभाए मेढगिरि-सिहरे।
आहुट्ठय-कोडीओ णिव्वाण गया णमो तेसिं॥१६॥

वंसत्थल-वण-णियरे पच्छिम-भायम्मि कुन्थुगिरि-सिहरे।
कुल-देसभूसण-मुणी णिव्वाण गया णमो तेसिं॥१७॥

जसरह-रायस्स सुआ पञ्चसया कलिंग-देसम्मि।
कोडिसिलाए कोडि-मुणी णिव्वाण गया णमो तेसिं॥१८॥

पासस्स समवसरणे गुरुदत्त-वरदत्त-पञ्च-रिसिपमुहा।
रिस्सिंदे गिरिसिहरे णिव्वाण गया णमो तेसिं॥१९॥

जे जिणु जित्थु तत्था जे दु गया णिव्वुदिं परमं।
ते वंदामि य णिच्चं तिरयण-सुद्धो णमंसामि॥२०॥

सेसाणं तु रिसीणं णिव्वाणं जम्मि जम्मि ठाणम्मि।
ते हं वन्दे सव्वे दुक्खक्खय-कारणट्ठाए॥२१॥


स्रोत: बृहज्जिनवाणी संग्रह (विशेष पूजन खण्ड), पृष्ठ २७५ से २७६

पाठ सूची, अकारादि क्रम (अ से ज्ञ) | Path Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
गाथा सूची, अकारादि क्रम (अ से ज्ञ) | Gatha Suchi A to Z
दीपावली (वीर निर्वाण महोत्सव) | पूजन, पाठ, भजन, लेख: सम्पूर्ण सामग्री एक जगह | Deepawali (Veer Nirvan Mahotsav) | Pujan, Path, Bhajan, Lekh: Sampurn Samagri Ek Jagah
श्री सम्मेद शिखर जी : सम्पूर्ण सामग्री संग्रह | Shri Sammed Shikhar Ji : Sampurn Samagri Sangrah