तैं क्या किया नादान
तैं क्या किया नादान, तैं तो अमृत तजि विष लीना॥टेक॥
लख चौरासी जौनी माहिं तैं, श्रावक कुल में आया।
अब तजि तीन लोक के साहिब, नवग्रह पूजन धाया॥
तैं क्या किया नादान, तैं तो अमृत तजि विष लीना॥१॥
वीतराग के दरसन ही तैं, उदासीनता आवै।
तू तौ जिनके सनमुख ठाडा, सुत को ख्याल खिलावै॥
तैं क्या किया नादान, तैं तो अमृत तजि विष लीना॥२॥
सुरग सम्पदा सहजै पावै, निश्चय मुक्ति मिलावै।
ऐसी जिनवर पूजन सेती, जगत कामना चावै॥
तैं क्या किया नादान, तैं तो अमृत तजि विष लीना॥३॥
‘बुधजन’ मिलें सलाह कहैं तब, तू वापै खिजि जावे।
जथा जोग कौं अजथा माने, जनम-जनम दुख पावै॥
तैं क्या किया नादान, तैं तो अमृत तजि विष लीना॥४॥
Artist: पं. बुधजन जी
स्रोत: nikkyjain.github.io (पं बुधजन कृत भजन)
खोज: Tain Kya Kiya Nadan