प्रानी! ये संसार असार है, गर्व न कर मनमाहिं।
जे जे उपजैं भूमिपै, जमसौं छूटैं नाहिं॥टेक॥
इन्द्र महा जोधा बली, जीत्यो रावनराय।
रावन लछमनने हत्यो, जम गयो लछमन खाय॥
प्रानी! ये संसार असार है, गर्व न कर मनमाहिं॥१॥
कंस जरासंध सूरमा, मारे कृष्ण गुपाल।
ताको जरदकुमार ने, मार्यो सोऊ काल॥
प्रानी! ये संसार असार है, गर्व न कर मनमाहिं॥२॥
कई बार छत्री हते, परशुराम वल साज।
मार्यो सोउ सुभूमिने, ताहि हन्यो जमराज॥
प्रानी! ये संसार असार है, गर्व न कर मनमाहिं॥३॥
सुर नर खग सब वश करे, भरत नाम चक्रेश।
बाहूबलपै हारकै, मान रह्यो नहिं लेश॥
प्रानी! ये संसार असार है, गर्व न कर मनमाहिं॥४॥
जिनकी भौहैं फरकतैं, डरते इन्द फनिंद।
पाँयनि परवत फोरते, खाये काल-मृगिंद॥
प्रानी! ये संसार असार है, गर्व न कर मनमाहिं॥५॥
नारी संकलसारखी, सुत फाँसी अनिवार।
घर बंदीखाना कहा, लोभ सु चौकीदार॥
प्रानी! ये संसार असार है, गर्व न कर मनमाहिं॥६॥
अन्तर अनुभव कीजिये, बाहिर करुणाभाव।
दो वातनिकरि हुजिये, ‘द्यानत’ शिवपुरराव॥
प्रानी! ये संसार असार है, गर्व न कर मनमाहिं॥७॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Prani Ye Sansar Asar Hai