प्रात भयो सब भविजन मिलिकै
प्रात भयो सब भविजन मिलिकै, जिनवर पूजन आवो ।
अशुभ मिटावो पुन्य बढावो, नैननि नींद गमावो ॥टेक॥
तनको धोय धारि उजरे पट, सुभग जलादिक ल्यावो ।
वीतरागछवि हरखि निरखिकै, आगमोक्त गुन गावो ॥
प्रात भयो सब भविजन मिलिकै, जिनवर पूजन आवो ॥2॥
शास्तर सुनो भनो जिनवानी, तप संजम उपजावो ।
धरि सरधान देव गुरु आगम, सात तत्त्व रुचि लावो ॥
प्रात भयो सब भविजन मिलिकै, जिनवर पूजन आवो ॥3॥
दुःखित जनकी दया ल्याय उर, दान चारिविधि द्यावो ।
राग दोष तजि भजि निज पदको, ‘बुधजन’ शिवपद पावो ॥
प्रात भयो सब भविजन मिलिकै, जिनवर पूजन आवो ।
अशुभ मिटावो पुन्य बढावो, नैननि नींद गमावो ॥४॥
Artist: पं. बुधजन जी
स्रोत: nikkyjain.github.io (पं बुधजन कृत भजन)
खोज: Praat Bhayo Sab Bhavijan Milikai, Prat Bhayo Sab Bhavijan Milikai