म्हानै पतो बताद्यो, थाँसू दुनिया में दूजो और कुण ॥टेक॥
तीन लोक पति आप चराचर, तीन काल की जाणो,
थाँनै छोड़ शरण ल्यूँ कुण री, या तो जरा बताद्यो ॥
म्हानै पतो बताद्यो, थाँसू दुनिया में दूजो और कुण ॥१॥
मिल्या अनन्ता कामी क्रोधी, भोग रोग भव वासी,
वीतराग निर्दोष न भेंट्यो, देखी मथुरा काशी ॥
म्हानै पतो बताद्यो, थाँसू दुनिया में दूजो और कुण ॥२॥
वात पित्त कफ तन पीड़ा हर, वन वन औषध ऊभी,
जन्म जरा मृत्यु भय नाशक, मिली न थाँसी खूबी ॥
म्हानै पतो बताद्यो, थाँसू दुनिया में दूजो और कुण ॥३॥
उत्तम मंगल शरण आपकी, दर्शन आनन्दकारी,
निज पर ज्ञान कला सरसावे, निश्चय सुख फुलवारी ॥
म्हानै पतो बताद्यो, थाँसू दुनिया में दूजो और कुण ॥४॥
इन्द्र संपदा चक्रीपद की, नही याचना थाँसू,
आतम बल ‘सौभाग्य’ दिपास्यूँ, मिलै मोक्ष पद जासूँ ॥
म्हानै पतो बताद्यो, थाँसू दुनिया में दूजो और कुण ॥५॥
Artist: श्री सौभाग्यमल जी
स्रोत: nikkyjain.github.io (पं सौभाग्यमल कृत भजन)
खोज: Mhanai Pato Batadyo Thansu