लागा आतमरामसों नेहरा
लागा आतमरामसों (मारो) नेहरा॥टेक॥
ज्ञानसहित मरना भला रे, छूट जाय संसार।
धिक्क! परौ यह जीवना रे, मरना बारंबार॥
लागा आतमरामसों नेहरा॥१॥
साहिब साहिब मुंहतैं कहते, जानैं नाहीं कोई।
जो साहिबकी जाति पिछानैं, साहिब कहिये सोई॥
लागा आतमरामसों नेहरा॥२॥
जो जो देखौ नैनोंसेती, सो सो विनसै जाई।
देखनहारा मैं अविनाशी, परमानन्द सुभाई॥
लागा आतमरामसों नेहरा॥३॥
जाकी चाह करैं सब प्रानी, सो पायो घटमाहीं।
‘द्यानत’ चिन्तामनि के आये, चाह रही कछु नाहीं॥
लागा आतमरामसों नेहरा॥४॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Laga Aatamramson Nehara, Laga Atamramson Nehara