देख्या मैंने नेमिजी प्यारा
देख्या मैंने नेमिजी प्यारा॥टेक॥
मूरति ऊपर करों निछावर, तन धन जोबन जीवन सारा॥
जाके नख की शोभा आगैं, कोटि काम छवि डारौं वारा।
कोटि संख्य रवि चन्द छिपत हैं, वपु की द्युति है अपरंपारा॥१॥
जिनके वचन सुनें जिन भविजन, तजि गृह मुनिवर को व्रत धारा।
जाको जस इन्द्रादिक गावैं, पावैं सुख नासैं दुख भारा॥२॥
जाके केवलज्ञान बिराजत, लोकालोक प्रकाशन हारा।
चरन गहेकी लाज निवाहो, प्रभुजी ‘द्यानत’ भगत तुम्हारा॥३॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Dekhya Maine Nemiji Pyara