चेतन यह बुधि कौन सयानी, कही सुगुरु हित सीख न मानी
चेतन यह बुधि कौन सयानी, कही सुगुरु हित सीख न मानी।
कठिन काकताली ज्यौं पायौ, नरभव सुकुल श्रवनु जिनवानी॥चेतन.॥
भूमि न होत चाँदनीकी ज्यौं, त्यौं नहिं धनी ज्ञेयको ज्ञानी।
वस्तुरूप यौं तू यौं ही शठ, हटकर पकरत सोंज विरानी॥१॥चेतन.॥
ज्ञानी होय अज्ञान राग-रुषकर निज सहज स्वच्छता हानी।
इन्द्रिय जड़ तिन विषय अचेतन, तहां अनिष्ट इष्टता ठानी॥२॥चेतन.॥
चाहै सुख, दुख ही अवगाहै, अब सुनि विधि जो है सुखदानी।
‘दौल’ आपकरि आप आपमैं, ध्याय ल्याय लय समरससानी॥३॥चेतन.॥
Artist: कविवर श्री दौलत राम जी
स्रोत: दौलत भजन सौरभ, पृष्ठ ११५