चेतन नागर हो तुम, चेतो चतुर सुजान, आपहित कीजिये हो॥
प्रथम प्रणमु अरहन्त जिनेश्वर, अनंत चतुष्टयधारी।
सिद्ध सूरि गुरु मुनिपद बन्दों, पंच परम उपगारी॥
बन्दों शारद भवदधिपारद, कुमतिविनाशनहारी।
देहु सुबुद्धि मेरे घट अन्तर, कहों कथा हितकारी॥
चेतन नागर हो तुम, चेतो चतुर सुजान, आपहित कीजिये हो॥१॥
यह संसार अनादि अनन्त, अपार असार बतायो।
जीव अनादि कालसों ले करि, मिथ्यासों लपटायो॥
ता भ्रमत चहूँगति भीतर, सुख नहिं दुख बहु पायो।
जिनवानी सरधान बिना तैं, काल अनन्त गुमायो॥
चेतन नागर हो तुम, चेतो चतुर सुजान, आपहित कीजिये हो॥२॥
काम भोगकै सुख मानत है, विषय रोग की पीरा।
तासु विपाक अनन्त गुणा तोहि, नरकमाहिं है धीरा॥
पाप करमकरि सुख चाहत है, सुख नहिं ह्वै है वीरा।
बोये आक आम किमि खैहो, काँच न ह्वै है हीरा॥
चेतन नागर हो तुम, चेतो चतुर सुजान, आपहित कीजिये हो॥३॥
पाप करम करि दरब कमायो, पापहि हेत लगायो।
दोनों पाप कौन भोगैगो, सो कछु भेद न पायो॥
दुशमन पोषि हरष बहु मान्यो, मित्र न संग सुहायो।
नरभव पाय कहा कीनों, मानुष वृथा कहायो॥
चेतन नागर हो तुम, चेतो चतुर सुजान, आपहित कीजिये हो॥४॥
सात नरक के दुख भूले अरु गरभ जनम हू भूले।
काल दाढ़ विच कौन अशुचि तन, कहा जान जिय फूले॥
जान बूझ तुम भये बावरे, भरम हिंडोले झूले।
राई सम दुख सह न सकत हो, काम करत दुखमूले॥
चेतन नागर हो तुम, चेतो चतुर सुजान, आपहित कीजिये हो॥५॥
साता होत कछुक सुख माने, होत असाता रोवै।
ये दोनों हैं कर्म अवस्था, आप नहीं किन जोवै॥
औरन सीख देत बहु नीकी, आप न आप सिखावै।
सांच साच कछु झूठ रंच नहिं, याही दुख पावै॥
चेतन नागर हो तुम, चेतो चतुर सुजान, आपहित कीजिये हो॥६॥
पाप करत बहु कष्ट होत है, धरम करत सुख भाई!
बाल गुपाल सबै इम भाषै, सो कहनावत आई!
दुहि में जो तोकौं हित लागै, सो कर मन-वच-काई।
तुमको बहुत सीख क्या दीजे, तुम त्रिभुवन के राई॥
चेतन नागर हो तुम, चेतो चतुर सुजान, आपहित कीजिये हो॥७॥
बस पंचेन्द्री सेती मानुष, औसर फिर नहिं पै है।
तन धन आदि सकल सामग्री देखत देखत जे है॥
समझ समझ अब ही तू प्राणी! दुरगति में पछतैहै।
भज अरहन्तचरण जुग ‘धानत’, बहुरि न जगमें ऐ है॥
चेतन नागर हो तुम, चेतो चतुर सुजान, आपहित कीजिये हो॥८॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Chetan Nagar Ho Tum Cheto Chatur Sujan