भोर भयो भज श्रीजिनराज
भोर भयो भज श्रीजिनराज, सफल होहिं तेरे सब काज॥टेक॥
धन सम्पत मनवांछित भोग, सब विधि आन बनैं संजोग॥
कल्पवृच्छ ताके घर रहै, कामधेनु नित सेवा बहै।
पारस चिन्तामनि समुदाय, हितसौं आय मिलैं सुखदाय॥
भोर भयो भज श्रीजिनराज, सफल होहिं तेरे सब काज॥१॥
दुर्लभतैं सुलभ्य ह्वै जाय, रोग सोग दुख दूर पलाय।
सेवा देव करै मन लाय, विघन उलट मंगल ठहराय॥
भोर भयो भज श्रीजिनराज, सफल होहिं तेरे सब काज॥२॥
डायन भूत पिशाच न छलै, राज चोर को जोर न चले।
जस आदर सौभाग्य प्रकास, ‘द्यानत’ सुरग मुकतिपदवास॥
भोर भयो भज श्रीजिनराज, सफल होहिं तेरे सब काज॥३॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Bhor Bhayo Bhaj Shri Jinaraj