भोंदू भाई, ते हिरदे की आँखें।
जै करषै अपनी सुख सम्पति, भ्रम की सम्पति नाखें॥टेक॥
जे आँखें अमृतरस बरसैं, परखैं केवल वानी।
जिन्ह आँखिन विलोक परमारथ, होहिं कृतारथ प्रानी॥
भोंदू भाई, ते हिरदै की आँखैं॥१॥
जिन आँखिनहिं दशा केवल की, कर्म लेप नहिं लागै।
जिन आँखिन के प्रगट होत घट, अलख निरंजन जागै॥
भोंदू भाई, ते हिरदै की आँखैं॥२॥
जिन आँखिन सौं निरखि भेद गुन, ज्ञानी ज्ञान विचारै।
जिन आँखिन सौं लखि स्वरूप मुनि, ध्यान धारणा धारै॥
भोंदू भाई, ते हिरदे की आँखें॥३॥
जिन आँखिन के जगे जगत के, लगे काज सब झूठे।
जिन सौं गमन होंइ शिव सनमुख, विषय-विकार अपूठे॥
भोंदू भाई, ते हिरदे की आँखें॥४॥
इन आँखिन में प्रभा परम को, पर सहाय नहीं लेखें।
जे समाधि सौं लखे अखण्डित, ढकै न पलक निमेखैं॥
भोंदू भाई, ते हिरदै की आँखैं॥५॥
जिन आँखिन की ज्योति प्रगटकैं, इन आँखिन में भासै।
तब इनहू की मिटे विषमता, समता रस परगासै॥
भोंदू भाई, ते हिरदे को आँखैं॥६॥
जे आँखैं पूरनस्वरूप धरि, लोकालोक लखावैं।
ए वे यह वह सब विकल्प तजि, निरविकल्प पद पायें॥
भोंदू भाई, ते हिरदे को आँखें॥७॥
Artist: पं. बनारसीदास जी
स्रोत: nikkyjain.github.io (पं बनारसीदास कृत भजन)
खोज: Bhondu Bhai Te Hirde Ki Aankhen, Bhondu Bhai Te Hirde Ki Ankhen