अब हम नेमिजी की शरन
अब हम नेमिजी की शरन।
और ठौर न मन लागत है, छांडि प्रभु के चरन॥टेक॥
सकल भवि-अघ-दहन वारिद, विरद तारन तरन।
इन्द्र चन्द फनिन्द ध्यावै, पाय सुख दुख हरन॥
अब हम नेमिजी की शरन॥1॥
भरम-तम-हर-तरनि, दीपति, करम गन खय करन।
गनधरादि सुरादि जाके, गुन सकत नहि वरन॥
अब हम नेमिजी की शरन॥2॥
जा समान त्रिलोक में हम, सुन्यौं और न करन।
दास द्यानत दयानिधि प्रभु, क्यों तजैंगे परन॥
अब हम नेमिजी की शरन॥3॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Ab Ham Nemiji Ki Sharan