आतमज्ञान लखैं सुख होइ
आतमज्ञान लखैं सुख होइ॥टेक॥
पंचेन्द्री सुख मानत भोंदू, यामें सुख को लेश न कोइ॥
जैसे खाज खुजावत मीठी, पीछैं तैं दुखतैं दे रोइ।
रुधिरपान करि जोंक सुखी है, सूँतत बहुदुख पावै सोई॥
आतमज्ञान लखैं सुख होइ॥1॥
फरस-दन्तिरस-मीनगंध-अलि, रूप-शलभमृग-नाद हिलोइ।
एक एक इन्द्रनितैं प्राणी, दुखिया भये गये तन खोइ॥
आतमज्ञान लखैं सुख होइ॥२॥
जैसे कूकर हाड़ चचौरै, त्यों विषयी नर भोगै भोइ।
‘द्यानत’ देखो राज त्यागि नृप, वन वसि सहैं परीषह जोइ॥
आतमज्ञान लखैं सुख होइ॥3॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Aatamagyan Lakhain Sukh Hoi, Atamagyan Lakhain Sukh Hoi