आदिनाथ तारन तरनं
आदिनाथ तारन तरनं।
नाभिराय मरुदेवी नन्दन, जनम अयोध्या अघहरनं॥टेक॥
कलपवृच्छ गये जुगल दुखित भये, करमभूमि विधिसुखकरनं।
अपछर नृत्य मृत्य लखि चेते, भव तन भोग जोग धरनं॥
आदिनाथ तारन तरनं॥१॥
कायोत्सर्ग छमास धर्यो दिढ़, वन खग मृग पूजत चरनं।
धीरजधारी वरसअहारी, सहस वरस तप आचरनं॥
आदिनाथ तारन तरनं॥२॥
करम नासि परगासि ज्ञानको, सुरपति कियो समोसरनं।
सब जन सुख दे शिवपुर पहुँचे, ‘द्यानत’ भवि तुम पद शरनं॥
आदिनाथ तारन तरनं॥3॥
Artist: पं. द्यानतराय जी
स्रोत: nikkyjain.github.io (पं द्यानतराय कृत भजन)
खोज: Aadinath Taaran Taranam, Adinath Taran Taranam