(आर्या)
थोसामि गणधराणं अणयाराणं गुणेहि तच्चेहि।
अंजुलिमउलियहत्थो अहिबंदंतो सविभवेण॥१॥
सम्मं चेव य भावे मिच्छाभावे तहे व बोद्धव्वा।
चइऊग मिच्छभावे सम्ममि उवट्ठिदे वंदे॥२॥
दोदोसविप्पमुक्के तिदंडविरदे तिसल्लपरिसुद्धे।
तिण्णियगारवरहिए तियरणसुद्धे णमस्सामि॥३॥
चउविहकसायमहणे चउगइसंसारगमणभयभीए।
पंचासवपडिविरदे पंचेंदियणिज्जदे वंदे॥४॥
छज्जीवदयावण्णे छडायदणविवज्जिये समिदभावे।
सत्तभयविप्पमुक्के सत्ताणभयंकरे वंदे॥५॥
णदट्ठमघट्ठाणे पणट्ठकम्मट्ठणट्ठसंसारे।
परमट्ठणिट्ठिमट्ठे अट्ठगुणट्ठीसरे वंदे॥६॥
णवबंभचेरगुत्ते णवणयसब्भावजाणगे बंदे।
दसविहधम्मट्ठाई दससंजमसंजुदे वंदे॥७॥
एयारसंगसुदसायरपारगे बारसंगसुदणिउणे।
बारसविहतवणिरदे तेरसकिरयापडे वंदे॥८॥
भूदेसु दयावण्णे चउ दस चउदस सुगंथपरिसुद्धे।
चउदसपुव्वपगब्भे चउदसमल वज्जिदे वंदे॥९॥
वन्दे चउत्थभत्ता जावदि छम्मासखवणि पाडिपुण्णे।
बंदे अदावन्ते सूरस्स य अहिमुहट्ठिदे सूरे॥१०॥
बहुविहपडिमट्ठाई णिसेज्जवीराणोज्झवासीयं।
अणिट्ठु अकुडुँबदीये चतदेहे य णमस्सामि॥११॥
ठाणियमोणवदीए अब्भोवासी य रुक्खमूलीय।
धुदकेसमंसु लोमे णिप्पडियम्मे च वंदामि॥१२॥
जल्लमललित्तगत्ते बंदे कम्ममलकलुसपरिसुद्धे।
दीहणहणमंसु लोये तवसिरिभरिए णमस्सामि॥१३॥
णाणोदयाहिसित्ते सीलगुणविहूसिये तवसुगन्धे।
ववगयरायसुदट्ठे सिवगइपहणायगे वंदे॥१४॥
उग्गतवे दित्ततवे तत्ततवे महातवे य घोरतवे।
वंदामि तवमहंते तवसंजमइड्डिसम्पत्ते॥१५॥
आमोसहिएखेलोसहिएजल्लोसहिय तवसिद्धे।
विप्पोसहिए सव्वोसहिए वंदामि तिविहेण॥१६॥
अमयमुहघोरसथी सव्वी अक्खीण महाणसे वंदे।
मणवत्तिवचंवलिकायवण्णिणो य वंदामि तिविहेण॥१७॥
वरकुट्ठ वीयबुद्धी पयाणुसारीयसमिण्णसोयारे।
उग्गहईहसमत्थे सुतत्थविसारदे वंदे॥१८॥
आभिणिबोहियसुदई ओहिणाणमणणाणि सव्वणाणीय।
वंदे जगप्पदीवे पच्चक्खपरोक्खणाणीय॥१९॥
आयासततुजलसे ढिचारणे जंघचारणे वंदे।
विउव्वणइड्ढिहाणे विज्जाहरपण्णसमणे य॥२०॥
गइचउरंगुलगमणे तहेव फलफुल्लचारणे वंदे।
अणुवमतवमहंते देवासुरवंदिदे वंदे॥२१॥
जियभयजियउवसग्गे जियइंदियपरिसहे जियकसाये।
जियरायदोसमोहे जियसुहदुक्खे णमस्सामि॥२२॥
एवमए अभित्थुआ अणयारा रायदोसपरिसुद्धा।
संघस्स वरसमाहिं मज्झवि दुक्खक्खयं दिंतु॥२३॥
इच्छामि भंते जोगभत्ति काओसग्गो कओ तस्सालोचेओ
अट्ठाइजजीवदोससुद्धसु पण्णरसकम्मभूमीसु आदावणरुक्खमूल
अब्भावासठाणमोणवीरासणेक्कवासकुक्कडास-
णचउत्थपरकरक्खवणादिजोगजुत्ताणं सव्वसाहूणं णिच्चकालं अंचेमि
पूजेमि वंदामि णमंस्सामि दुक्खक्खय कम्मक्खय बोहिलाओ
सुगइगमणं सम्म समाहिमरणं जिणगुण- संपत्ति होउ मज्झं।
स्रोत: जैन विधि विधान (सं. पण्डित अभयकुमार जैन, अखिल भारतीय जैन युवा फैडरेशन), पृष्ठ ६४ से ६६