पंच-महागुरु-भक्ति (आ. कुन्दकुन्द स्वामी)

पंच-महागुरु-भक्ति (आ. कुन्दकुन्द स्वामी)

मणुय-णाइंद-सुर-धरिय-छत्तत्तया,
पंचकल्लाण-सोक्खावली-पत्तया।
दंसणं णाण झाणं अणंतं बलं,
ते जिणा दिंतु अम्हं वरं मंगलं ।। 1 ।।

जेहिं झाणग्गि-बाणेहिं अइदड्ढयं,
जम्म-जर-मरण-णयरत्तयं दड्ढयं,
जेहिं पत्तं सिवं सासयं ठाणयं,
ते महं दिंतु सिद्धा वरं णाणयं ।। 2 ।।

पंचहाचार-पंचग्गि-संसाहया,
बारसंगाइ-सुअ-जलहि-अवगाहया।
मोक्ख-लच्छी महंती महं ते सया,
सूरिणो दिंतु मोक्खं गयासं गया ।। 3 ।।

घोर-संसार-भीमाडवी-काणणे,
तिक्ख-वियराल-णह-पाव-पंचाणणे।
णट्ठ-मग्गाण जीवाण पहदेसिया,
वंदिमो ते उवज्झाय अम्हे सया ।। 4 ।।

उग्ग-तव-चरण-करणेहिं झीणंगया,
धम्म-वर-झाण-सुक्केक्क-झाणं गया।
णिब्भरं तव-सिरीए समालिंगया,
साहवो ते महं मोक्ख-पह-मग्गया ।। 5 ।।

एण थोत्तेण जो पंचगुरु वंदए,
गुरुय-संसार-घण-वेल्लि सो छिंदए।
लहइ सो सिद्धि-सोक्खाइं वरमाणणं,
कुणइ कम्मिंधणं-पुंज-पज्जालणं ।। 6 ।।

अरुहा सिद्धाइरिया उवज्झाया साहु-पंचपरमेट्ठी।
एयाण णमोयारा भवे भवे मम सुहं दिंतु ।। 7 ।।

अञ्चलिका
इच्छामि भंते! पंचमहागुरुभत्ति-काउस्सग्गो कओ, तस्सालोचेउं। अट्ठमहा-पाडिहेर-संजुत्ताणं अरिहंताणं, अट्ठगुण-संपण्णाणं उड्ढ-लोय-मत्थयम्मि पइट्ठियाणं सिद्धाणं, अट्ठपवयण-माउ-संजुत्ताणं आयरियाणं, आयारादि-सुद-णाणोवदेसयाणं उवज्झायाणं, ति-रयण-गुण-पालणरयाणं सव्वसाहूणं, णिच्चकालं अंचेमि, पूजेमि, वंदामि, णमंसामि, दुक्खक्खओ, कम्मक्खओ, बोहिलाहो, सुगइ-गमणं, समाहि-मरणं, जिण-गुण-संपत्ति होउ मज्झं।

7 Likes