(छन्द मदावलिप्रकपोल ( मात्रा २४ ))
सहसार दिवि त्यागि, नगर कम्पिला जनम लिय।
कृतधर्मा नृपनंद, मातु जयसेन धर्मप्रिय।
तीन लोक वरनन्द, विमल जिन विमल विमलकर।
थापों चरनसरोज, जजनके हेत भावधर॥१॥
ॐ ह्रीं श्रीविमलनाथजिनेन्द्र अत्र अवतर अवतर। संवौषट्॥१॥
ॐ ह्रीं श्रीविमलनाथजिनेन्द्र अत्र तिष्ठ तिष्ठ। ठः ठः॥२॥
ॐ ह्रीं श्रीविमलनाथजिनेन्द्र अत्र मम सन्निहितो भव भव। वषट्॥३॥
(अष्टक।)
(सोरठा छंद।)
कंचनझारी धारि, पदमद्रहको नीर ले।
तृषा रोग निरवारि, विमल विमलगुन पूजिये॥१॥
ॐ ह्रीं श्रीविमलनाथजिनेन्द्राय जन्ममृत्युविनाशनाय जलं निर्वपामीति स्वाहा॥१॥
मलयागर करपूर, देववल्लभा संग घसि।
हरि मिथ्यातमभूर, विमलविमलगुन जजतु हों॥२॥
ॐ ह्रीं श्रीविमलनाथजिनेन्द्राय भवातापविनाशनाय चंदनं निर्वपामीति स्वाहा॥
बासमतीसुखदास, श्वेत निशापतिको हंसे।
पूरै वांछित आस, विमलविमलगुन जजत ही॥३॥
ॐ ह्रीं श्रीविमलनाथजिनेन्द्राय अक्षयपदप्राप्तये अक्षतान् निर्वपामीति स्वाहा॥३॥
पारिजात मंदार, सन्तानकसुरतरुजनित।
जजों सुमन भरि थार, विमल विमलगुन मदनहर॥४॥
ॐ ह्रीं श्रीविमलनाथजिनेन्द्राय कामबाणविध्वंसनाय पुष्पं निर्वपामीति स्वाहा।
नव्यगव्य रसपूर, सुवरनथार भरायकैं।
क्षुधावेदनी चूर, जजों विमलपद विमलगुन॥५॥
ॐ ह्रीं श्रीविमलनाथजिनेन्द्राय क्षुधारोगविनाशनाय नैवेद्यं निर्वपामीति स्वाहा।
मानिक दीप अखंड, गा छाई वर गो दशों।
हरो माहतम चंड, विमल विमलमतिके धनी॥६॥
ॐ ह्रीं श्रीविमलनाथजिनेन्द्राय मोहान्धकारविनाशनाय दीपं निर्वपामीति स्वाहा॥
अगर तगर घनसार, देवदार कर चूर वर।
खेवों वसु भरि जार, विमल विमलपदपदमहिंग॥७॥
ॐ ह्रीं श्रीविमलनाथजिनेन्द्राय अष्टकर्मदहनाय धूपं निर्वपामीति स्वाहा॥७॥
श्रीफल सेव अनार, मधुर रसीले पावने।
जजों विमलपद सार, विघ्न हरै शिवफल करै॥८॥
ॐ ह्रीं श्रीविमलनाथजिनेन्द्राय मोक्षफलप्राप्तये फलं निर्वपामीति स्वाहा॥८॥
आठों दरब संवार, मनसुखदायक पावने।
जजों अरघ भरथार, विमल विमलशिवतिय-रमन॥६॥
ॐ ह्रीं श्रीविमलनाथजिनेन्द्राय अनर्घ्यपदप्राप्तये अर्घं निर्वपामीति स्वाहा॥६॥
(पंचकल्याणक)
(छंद द्रुतविलम्बित तथा सुंदरि ( वर्ण १२ )।)
गरभ जेठबदी दशमी भनों, परम पावन सो दिन शोभनों।
करत सेव सची जननीतणी, हम जजैं पदपद्मशिरोमणी॥१॥
ॐ ह्रीं श्रीज्येष्ठकृष्णादशम्यां गर्भमंगलमण्डिताय श्रीविमलनाथजिनेन्द्राय अर्घं निर्वपामीति स्वाहा॥१॥
शुकलमाघ तुरो तिथि जानिये, जनममंगल तादिन मानिये।
हरि तबै गिरिराज विषै जजे, हम समर्चत आनंद को सजे॥
ॐ ह्रीं माघशुक्लचतुर्दश्यां जन्ममंगलप्राप्ताय श्रीविमलनाथजिनेन्द्राय अर्घं निर्वपामीति स्वाहा॥२॥
तप धरे सितमाघ तुरी भली, निज सुधातम ध्यावत हैं रलीं।
हरि फनेश नरेश जजैं तहां, हम जजैं नित आनंदसों इहां॥
ॐ ह्रीं माघशुक्लचतुर्दश्यां निष्क्रमणकल्याणकमण्डिताय श्रीविमलनाथजिनेन्द्राय अर्घं निर्वपामीति स्वाहा॥३॥
विमल माघरसी हनि घातिया, विमलबोध लयो सब भासिया
विमल अर्घ चढ़ाय जजों अबै, विमल आनंद देहु हमें सबै॥
ॐ ह्रीं माघशुक्लषष्ठ्यां केवलज्ञानप्राप्ताय श्रीविमलनाथजिनेन्द्राय अर्घं निर्वपामीति स्वाहा॥४॥
अमरसाढरसी अति पावनं, विमल सिद्ध भये मनभावनं।
गिरसमेद हरी तित पूजिया, हम जजैं इतहर्ष धरें हिया॥५॥
ॐ ह्रीं आषाढकृष्णाषष्ठ्यां मोक्षम्गलप्राप्ताय श्रीविमलनाथजिनेन्द्राय अर्घं निर्वपामीति स्वाहा॥
(जयमाला)
(दोहा छन्द। अति उपमालंकार।)
गनन चहत उडुगन गगन, छिति थितिके छँहँ जेम।
तिमि गुन वरनन वरनन,–माहि होय तव केम॥१॥
साठधनुष तन तुंग है, हेमवरन अभिराम।
वर बराह पद अंक लखि, पुनि पुनि करों प्रनाम॥२॥
(छन्द तोटक। ( वर्ण १२ )।)
जय केवलब्रह्म अनन्तगुनी, तुव ध्यावत शेष महेश मुनी।
परमातम पूरन पापहनी, चितचिंततदायक इष्ट धनी॥३॥
भवआतपध्वंसन इंदुकरं, वर साररसोयन शर्मभरं।
सब जन्मजरामृतदाघहरं, शरनागतपालन नाथ वरं॥४॥
नित संत तुमे इन नामनितें, चितचिंतत हैं गुनगामनितें।
अमलं अछलं अटलैं अतुलं, अरलं अछलं अथलं अकुल॥५॥
अजरं अमरं अहरं अडरं, अपरं अभरं अशरं अनरं।
अमलीन अछीन अरीन हने, अमतं अगतं अरतं अघने॥६॥
अछुधा अतृषा अभयातम हो, अमदा अगदा अवदातम हो।
अविरुद्ध अक्रुद्ध अमानधुना, अतलं अशलं अनन्त गुना।७।
अरसं सरसं अकलैं सकलैं, अवचं सवचं अमनं सबलं।
इन आदि अनेकप्रकार सही, तुमको जिन संत जपैं नित ही॥
अब मैं तुमरी शरना पकरी, दुख दूर करो प्रभुजी हमरी।
हम कष्ट सहे भवकाननमें, कुनिगोद तथा थल आननमें॥६॥
तित जामनमर्न सहे जितने, कहि केम सकैं तुमसों तितने।
सुमुहूरत अन्तरमाहिं धरे, छह त्रै त्रय छःछहकाय खरे।१०।
छिति वह्नि बयारक साधरनं, लघु थूल विभेदनिसों मरनं।
परतेक वनस्पति ग्यारभये, छहजार दुवादश भेद लये॥११॥
सब द्वै त्रय भूषट छःसु भया, इक इन्द्रियकी परजाय लथा।
जुगइन्द्रिय काय असी गहियो, तिय इन्द्रिय साठनिमें रहियो॥
चतुरिन्द्रिय चालिस देह धरा, पनईन्द्रियके चवबीस वरा।
सब ये तन धार तहां सहियो, दुखघोर चितारित जात हियो॥
अब मो अरदास हिये धरिये, दुखद्वंद सबै अब ही हरिये।
मनवांछित कारज सिद्ध करो, सुखसार सबै घर ऋद्धि भरो।१४।
(घत्तानंद छन्द।)
जै विमलजिनेशा, नुतनाकेशा, नागेशा नरईश सदा।
भवतापअशेषा, हरनानशेषा, दाता चिन्तित शर्म सदा॥१५॥
ॐ ह्रीं श्रीविमलनाथजिनेन्द्राय पूर्णार्घं निर्वपामीति स्वाहा।
(दोहा छंद।)
श्रीमत विमलजिनेशपद, जो पूजौ मनलाय।
पूजै वांछित आश तसु, मैं पूजौं गुनगाय॥१६॥
(इत्याशीर्वादाय पुष्पांजलिं क्षिपेत्।)
(इति श्री विमलनाथजिनपूजा समाप्त॥१३॥)
स्रोत: पूजन रत्नाकर, पृष्ठ २२४ (पूजन रत्नाकर | Pujan Ratnakar)