ऊर्ध्वाधोरयुतं सविन्दु सपरं ब्रह्मस्वरावेष्टितं
वर्गापूरित-दिग्गताम्बुज-दलं तत्सन्धि-तत्त्वान्वितम्।
अन्तःपत्र-तटेष्वनाहतयुतं ह्रींकार-संवेष्टितं
देवं ध्यायति यः स मुक्ति-सुभगो वैरीभ-कण्ठीरवः॥
[ ॐ ह्रीं श्रीसिद्धचक्राधिपते सिद्धपरमेष्ठिन् ! अत्र अवतर अवतर संवौषट्।
ॐ ह्रीं श्रीसिद्धचक्राधिपते सिद्धपरमेष्ठिन् ! अत्र तिष्ठ तिष्ठ ठः ठः।
ॐ ह्रीं श्रीसिद्धचक्राधिपते सिद्धपरमेष्ठिन् ! अत्र मम सन्निहितो भव भव वषट्। ]
निरस्त-कर्म-सम्बन्धं सूक्ष्मं नित्यं निरामयम्।
वन्देऽहं परमात्मानममूर्त्तमनुपद्रवम्॥२॥
[ सिद्धयन्त्रस्थापनम्। ]
सिद्धौ निवासमनुगं परमात्म-गम्यं
हान्यादि-भाव-रहितं भव-वीत-कायम्।
रेवापगा-वर-सरो-यमुनोज्झवानां
नीरैर्यजे कलशगैर्वर-सिद्ध-चक्रम्॥३॥
[ ॐ ह्रीं क्षायिकसम्यक्त्व-अनन्तज्ञान-अनन्तदर्शन-अनन्तवीर्य-अगुरुलघुत्व-अवगाहनत्व-सूक्ष्मत्व-निराबाधत्वगुणसम्पन्न-सिद्ध-चक्राधिपतये सिद्धपरमेष्ठिने जन्ममृत्युविनाशनाय जलं निर्वपामीति स्वाहा। ]
आनन्द-कन्द-जनकं घन-कर्म-मुक्तं
सम्यक्त्व-शर्म-गरिमं जननार्ति-वीतम्।
सौरभ्य-वासित-भुवं हरि-चन्दनानां
गन्धैर्यजे परिमलैर्वर-सिद्ध-चक्रम्॥४॥
[ ॐ ह्रीं ‧ ‧ सिद्धचक्राधिपतये सिद्धपरमेष्ठिने संसारताप-विनाशनाय चन्दनं निर्वपामीति स्वाहा। ]
सर्वावगाहन-गुणं सुसमाधि-निष्ठं
सिद्ध-स्वरूप-निपुणं कमलं विशालम्।
सौगन्ध्य-शालि-वनशालि-वराक्षतानां
पुञ्जैर्यजे शशि-निभैर्वर-सिद्ध-चक्रम्॥५॥
[ ॐ ह्रीं ‧‧‧‧‧ सिद्धचक्राधिपतये सिद्धपरमेष्ठिने अक्षयपद-प्राप्तये अक्षतान् निर्वपामीति स्वाहा। ]
नित्यं स्वदेह-परिमाणमनादिसंज्ञं
द्रव्यानपेक्षममृतं मरणाघतीतम्।
मन्दार-कुन्द-कमलादि-वनस्पतीनां
पुष्पैर्यजे शुभतमैर्वर-सिद्ध-चक्रम्॥६॥
[ ॐ ह्रीं‧‧‧‧‧‧‧‧‧‧सिद्धचक्राधिपतये सिद्धपरमेष्ठिने कामबाण-विध्वंसनाय पुष्पं निर्वपामीति स्वाहा। ]
ऊर्ध्व-स्वभाव-गमनं सुमनो-व्यपेतं
ब्रह्मादि-बीज-सहितं गगनावभासम्।
क्षीरान्न-साज्य-बटकै रस-पूर्ण-गर्भै-
र्नित्यं यजे चरुवरैर्वर-सिद्ध-चक्रम्॥७॥
[ ॐ ह्रीं ‧‧ सिद्धचक्राधिपतये सिद्धपरमेष्ठिने क्षुधारोग-विध्वंसनाय नैवेद्यं निर्वपामीति स्वाहा। ]
आतङ्क-शोक-भय-रोग-मद-प्रशान्तं
निर्द्वन्द्व-भाव-धरणं महिमा-निवेशम्।
कर्पूर-वर्ति-बहुभिः कनकावदातैर्दीपै-
र्यजे रुचिवरैर्वर-सिद्ध-चक्रम्॥८॥
[ ॐ ह्रीं सिद्धचक्राधिपतये सिद्धपरमेष्ठिने मोहान्धकार-विनाशनाय दीपं निर्वपामीति स्वाहा। ]
पश्यन्स-मस्त-भुवनं युगपन्नितान्तं
त्रैकाल्य-वस्तु-विषये निविड-प्रदीपम्।
सद्द्रव्य-गन्ध-घनसार-विमिश्रितानां
धूपैर्यजे परिमलैर्वर-सिद्ध-चक्रम्॥९॥
[ ॐ ह्रीं ‧ सिद्धचक्राधिपतये सिद्धपरमेष्ठिने अष्टकर्म-दहनाय धूपं निर्वपामीति स्वाहा। ]
सिद्धासुरादिपति-यक्ष-नरेन्द्र-चक्रै-
र्ध्येयं शिवं सकल-भव्य-जनैः सुवन्द्यम्।
नारङ्गि-पूग-कदली-फल-नारिकेलैः
सोऽहं यजे वरफलैर्वर-सिद्ध-चक्रम्॥१०॥
[ ॐ ह्रीं ‧‧ सिद्धचक्राधिपतये सिद्धपरमेष्ठिने मोक्षफल-प्राप्तये फलं निर्वपामीति स्वाहा। ]
गन्धाढ्यं सुपयो मधुव्रत-गणैः संगं वरं चन्दनं
पुष्पौघं विमलं सदक्षत-चयं रम्यं चरुं दीपकम्।
धूपं गन्धयुतं ददामि विविधं श्रेष्ठं फलं लब्धये
सिद्धानां युगपत्क्रमाय विमलं सेनोत्तरं वाञ्छितम्॥११॥
[ ॐ ह्रीं ‧‧ सिद्धचक्राधिपतये सिद्धपरमेष्ठिने अनर्घ्यपद-प्राप्तये अर्घ्यं निर्वपामीति स्वाहा। ]
ज्ञानोपयोगविमलं विशदात्मरूपं
सूक्ष्म-स्वभाव-परमं यदनन्तवीर्यम्।
कर्माघ-कच्छ-दहनं सुख-शस्य-बीजं
वन्दे सदा निरुपमं वर-सिद्ध-चक्रम्॥१२॥
कर्माष्टक-विनिर्मुक्तं मोक्ष-लक्ष्मी-निकेतनम्।
सम्यक्त्वादि-गुणोपेतं सिद्धचक्रं नमाम्यहम्॥१३॥
[ ॐ ह्रीं ‧‧ ‧‧सिद्धचक्राधिपतये सिद्धपरमेष्ठिने महार्घं निर्व-पामीति स्वाहा। ]
त्रैलोक्येश्वर-वन्दनीय-चरणाः प्रापुः श्रियं शाश्वतीं
यानाराध्य निरुद्ध-चण्ड-मनसः सन्तोऽपि तीर्थङ्कराः।
सत्सम्यक्त्व-विबोध-वीर्य-विशदान्याबाधता द्यैर्गुणै-
र्युक्तांस्तानिह तोष्टवीमि सततं सिद्धान् विशुद्धोदयान्॥१४॥
[ पुष्पाञ्जलिं क्षिपामि। ]
जयमाला
विराग सनातन शान्त निरंश, निरामय निर्भय निर्मल हंस।
सुधाम विबोध-निधान विमोह, प्रसीद विशुद्ध सुसिद्ध-समूह॥
विदारित-संसृति-भाव निरङ्ग, समामृत-पूरित देव विसङ्ग।
अबन्ध कषाय-विहीन विमोह, प्रसीद विशुद्ध सुसिद्ध-समूह॥
निवारित-दुष्कृत-कर्म-विपाश, सदामल-केवल-केलि-निवास।
भवोदधि-पारग शान्त विमोह, प्रसीद विशुद्ध सुसिद्ध-समूह॥
अनन्त-सुखामृत-सागर-धीर, कलङ्क-रजो-मल-भूरि-समीर।
विखण्डित-काम विराम विमोह, प्रसीद विशुद्ध सुसिद्ध-समूह॥
विकार-विवर्जित तर्जित-शोक, विबोध-सुनेत्र-विलोकित-लोक।
विहार विराव विरङ्ग विमोह, प्रसीद विशुद्ध सुसिद्ध-समूह॥
रजोमल-खेद-विमुक्त विगात्र, निरन्तर नित्य सुखामृत-पात्र।
सुदर्शन-राजित नाथ विमोह, प्रसीद विशुद्ध सुसिद्ध-समूह॥
नरामर-वन्दित निर्मल-भाव, अनन्त-मुनीश्वर-पूज्य विहाव।
सहोदय विश्व महेश विमोह, प्रसीद विशुद्ध सुसिद्ध-समूह॥
विदम्भ वितृष्ण विदोष विनिद्र, परापर शङ्कर सार वितन्द्र।
विकोप विरूप विशङ्क विमोह, प्रसीद विशुद्ध सुसिद्ध-समूह॥
जरा-मरणोज्झित वीत-विहार, विचिन्तित निर्मल निरहङ्कार।
अचिन्त्य-चरित्र विदर्प विमोह, प्रसीद विशुद्ध सुसिद्ध-समूह॥
विवर्ण विगन्ध विमान विलोभ, विमाय विकाय विशब्द विशोभ।
अनाकुल केवल सर्व विमोह, प्रसीद विशुद्ध सुसिद्ध-समूह॥
(घत्ता)
असम-समयसारं चारु-चैतन्य-चिह्नं
पर-परिणति-मुक्तं पद्मनदीन्द्र-वन्द्यम्।
निखिल-गुण-निकेतं सिद्ध-चक्रं विशुद्धं
स्मरति नमति यो वा स्तौति सोऽभ्येति मुक्तिम्॥
[ ॐ ह्रीं ‧ ‧ सिद्धचक्राधिपतये सिद्धपरमेष्ठिने महाघ्यं निर्वपामीति स्वाहा। ]
स्रोत: ज्ञानपीठ पूजाञ्जलि (भारतीय ज्ञानपीठ), पृष्ठ ६८ (ज्ञानपीठ पूजाञ्जलि (भारतीय ज्ञानपीठ) | Gyanpith Pujanjali)