(सवैया)
श्रीजिनदेव सदा जयवंत, महंत, मुनि मन मांहि अराधैं;
आपहि की नित जाप जपैं, प्रभु पाय सहाय सुधी शिव साधैं।
आपहिको नित ध्यान करैं सब, संतनको सिधि होई समाधै;
अत्र विराजि प्रभु हमरी सब, दूर करौ विधिबंध उपाधै।
ॐ ह्रीं श्रीसंभवनाथजिनेन्द्राय ! अत्र अवतर अवतर संवौषट् इति आह्वाननम्।
ॐ ह्रीं श्रीसंभवनाथजिनेन्द्र ! अत्र तिष्ठ तिष्ठ ठः ठः स्थापनम्।
ॐ ह्रीं श्रीसंभवनाथजिनेन्द्र ! अत्र मम सन्निहितो भव भव वषट् सन्निधिकरणम्।
अष्टक
(चाल जोगीरासा)
निर्मल जल शुचि शीतल लेकर उत्तम भाजन धारौं,
पूजि जिनेश्वरके पदपंकज जन्म मरन दुख टारौं।
तारनतरन विरद सुनि जगमें लीनों शरणों आई,
संभवजी जगतार सिरोमणि हूजौ सरन सहाई।
ॐ ह्रीं श्रीसंभवनाथजिनेन्द्राय जन्मजरामृत्युविनाशनाय जलं निर्वपामीति०
वज्रागनि अरु वडवानलतैं दाह अधिक दुखदाई,
सो भवताप मिटै प्रभु पूजत चंदनसों नित भाई। तारन०
ॐ ह्रीं श्रीसंभवनाथजिनेन्द्राय संसारतापविनाशनाय चंदनं निर्वपामीति०
चन्द्र-किरन सम श्वेत मनोहर अक्षत धोय धरीजे,
अक्षयपद के कारन पूजा श्रीजिनवर की कीजे। तारन०
ॐ ह्रीं श्रीसंभवनाथजिनेन्द्राय अक्षयपदप्राप्तये अक्षतान् निर्वपामीति स्वाहा।
सुर-तरुके बहु फूल मनोहर सकल सुरासुर लावैं,
समर सूल निरमूल करनको श्रीजिनचरन चढावैं। तारन०
ॐ ह्रीं श्रीसंभवनाथजिनेन्द्राय कामबाणविध्वंसनाय पुष्पं निर्वपामीति स्वाहा।
नव्य गव्य सुचि हव्य मनोरम कंचन थाल भरावैं,
क्षुधारोग निवारन कारन श्रीजिनचरन चढावैं।
तारनतरन विरद सुनि जगमें लीनों शरणो आई,
संभवजी जगतार सिरोमणि हूजौ सरन सहाई।
ॐ ह्रीं श्रीसंभवनाथजिनेन्द्राय क्षुधारोगविनाशनाय नैवेद्यं निर्वपामीति स्वाहा।
रतन अमोलक कंचन भाजन धार महीपति लावैं,
मोह तिमिर के नासन कारन श्रीजिनचरन चढावैं। तारन०
ॐ ह्रीं श्रीसंभवनाथजिनेन्द्राय मोहांधकारविनाशनाय दीपं निर्वपामीति स्वाहा।
अगर तगर कपूर सुगंधित द्रव्य अनेक प्रकारी,
धूप दसंगी खेय धनंजय, पूजो जिन हितकारी। तारन०
ॐ ह्रीं श्रीसंभवनाथजिनेन्द्राय अष्टकर्मदहनाय धूपं निर्वपामीति स्वाहा।
षटऋतुके फल प्रासुक उत्तम ले श्री जिनवर पूजौं,
भक्ति सहित जिनराज चरनके भक्त सुधी जन हूजौं। तारन०
ॐ ह्रीं श्रीसंभवनाथजिनेन्द्राय मोक्षफलप्राप्तये फलं निर्वपामीति स्वाहा।
वसु विधि अर्घ बनाय गाय गुन जिनवर चरन चढावै,
पुण्यवंत वह जीव जगतमें नाना विधि सुख पावै। तारन०
ॐ ह्रीं श्रीसंभवनाथजिनेन्द्राय अनर्घ्यपदप्राप्तये अर्घं निर्वपामीति स्वाहा।
पंचकल्याणक अर्घ
(चाल छंद)
फाल्गुन सुदि अष्टमि जानौं, जिन गर्भकल्याण प्रमानो,
हरि हर्षित पूज रचाई, हम पूजत तिहिं पद भाई।
ॐ ह्रीं फाल्गुनशुक्लाष्टम्यां गर्भमंगलमंडिताय श्रीसंभवनाथजिनेन्द्राय अर्घं निर्वपामीति स्वाहा।
कार्तिक सुदि पूरणमासी, जिन जन्म लियो सुखरासी,
सुर गिरि अभिषेक करायौ, सुरगण अति हर्ष बढायौ।
ॐ ह्रीं कार्तिकशुक्लपूर्णिमायां जन्ममंगलमंडिताय श्रीसंभवनाथजिनेन्द्राय अर्घं निर्वपामीति स्वाहा।
मगसिर तिथि पूरणमासी, प्रभु जगतैं होय उदासी,
तब देव ऋषीश्वर आये, जिन भाव विराग बढाये।
ॐ ह्रीं मार्गशीर्षशुक्लपूर्णिमायां तपोमंगलमंडिताय श्रीसंभवनाथजिनेन्द्राय अर्घं निर्वपामीति स्वाहा।
कार्तिक वदि चौथी बताई, प्रभु केवल किरन जगाई,
मुनि श्रावक धर्म बतायो, हम तिनको शीश नवायो।
ॐ ह्रीं कार्तिककृष्णचतुर्थ्यां ज्ञानमंगलमंडिताय श्रीसंभवनाथजिनेन्द्राय अर्घं निर्वपामीति स्वाहा।
छठि चैत सुदीको जानों, प्रभुने पायो सिव थानों,
सुर असुर हरषि गुन गाये, हम हूँ निज हित गुन गाये।
ॐ ह्रीं चैत्रशुक्लषष्ठ्यां मोक्षमंगलमंडिताय श्रीसंभवनाथजिनेन्द्राय अर्घं निर्वपामीति स्वाहा।
जयमाला
(दोहा)
संभव भव भय दूर कर, निजानन्द रस पूर,
निज गुण दाता जगतपति, मम उर बसो हजूर।
(छंद तोटक)
जयवंत जगतपति राजत हैं, समवसरनमें छवि छाजत हैं,
शशि सूरज कोटिक लाजत हैं, जिन देखत ही अघ भाजत हैं।
तहां वृक्ष अशोक महान दिपै, तिहिं देखत ही सब शोक छिपै,
चतुषष्टिसु चामर छत्र त्रयं, हरि आसन शोभित रत्नमयं।
नभतैं सुरपुष्प सुवृष्टि गिरे, मनु मन्मथ श्रीपति पाय परै,
नभमें सुरदुंदुभि राजत है, मधुरी मधुरी ध्वनि बाजत है।
सुर नारि तहां सिर नावत हैं, तुमरे गुण उज्ज्वल गावत हैं,
पद पंकजको चल रूप कियौ, बहु नाचत राजत भक्त हियौ।
घननं घननं घनघंट बजैं, सननं सननं सुर नारि सजैं,
झननं झननं धुनि नूपुरकी, छननं छननं छनमें फिरकी।
दृग आनन ओप अनूप महा, छन एक अनेकन रूप गहा,
बहुं भाव दिखावत भक्ति भरे, कविपै नहि वर्णन जाय करे।
जिनकी धुनि घोर सुने जबही, भवि मोर सुधी हरषैं तबही,
धर्मामृत वर्षत मेघझरी, भवताप तृषा सब दूर करी।
सुर ईश सदा शिर नावत हैं, गुण गावत पार न पावत हैं,
मुनि ईश तुम्हें नित ध्यावत हैं, तबही शिवसुंदरि पावत हैं,
प्रभु दीनदयाल दया करिये, हमरे विधिबंध सबै हरिये,
जगमें मम वास रहै जबलौं, उरमांहि रहौ प्रभु तबलौं।
(दोहा)
शिवमग दरशायौ जगत, करो धर्म तम दूर,
सो प्रभु मम हिरदै करौ, सुखसागर भरपूर।
ॐ ह्रीं श्रीसंभवनाथजिनेन्द्राय महार्घं निर्वपामीति स्वाहा।
(अडिल्ल छंद)
वर्तमान जिनराय भरतके जानिये,
पंचकल्याणक मानि गये शिवथानिये;
जो नर मन वच काय प्रभु पूजै सही,
सो नर दिव सुख पाय लहै अष्टम मही।
॥ इत्याशीर्वादः, पुष्पांजलिं क्षिपेत्॥
स्रोत: श्री जिनेन्द्र पूजासंग्रह (सोनगढ़), पृष्ठ १२५ (श्री जिनेन्द्र पूजासंग्रह (सोनगढ़) | Shri Jinendra Puja Sangrah (Songadh))