(अडिल्ल)
घणे जंतु रव कर्यो नेमि सुनि गिर गये,
तजि राजमति भव अनिति पेखि मुनिवर भये;
ध्यान खड्ग गहि हने कर्म शिव तिय वरी,
आह्वानन विधि करूँ प्रणमि गुण हिय धरी।
ॐ ह्रीं श्रीनेमिनाथजिनेन्द्र ! अत्र अवतर अवतर संवौषट् इति आह्वाननम्।
ॐ ह्रीं श्रीनेमिनाथजिनेन्द्र ! अत्र तिष्ठ तिष्ठ ठः ठः स्थापनम्।
ॐ ह्रीं श्रीनेमिनाथजिनेन्द्र ! अत्र मम सन्निहितो भव भव वषट् सन्निधिकरणम्।
(छंद त्रिभंगी)
निर्मल ल्याय महातीर्थोदक, कनक रतनमय भरि झारी,
मनवचतन सुध करि जिनपद पूजे, नसै जन्म मृति दुखकारी;
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय जन्मजरामृत्युविनाशनाय जलं निर्वपामीति स्वाहा।
शुभ कुंकुम ल्यावैं अगर मिलावैं, चंदनतें घनसार घसै,
तसु परसि समीर चलै अति सीतल, महा दाह ततकाल नसै।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय भवतापविनाशनाय चंदनं निर्वपामीति स्वाहा।
शुभ शालि अखंडित सौरभ मंडित, शशि सम उज्ज्वल अनियारे,
भूपन कूं औसर मुक्तासी द्युति, पुंज करैं भवि मनहारे।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय अक्षयपदप्राप्तये अक्षतं निर्वपामीति स्वाहा।
कुसुम मनोहर घ्राणनके हर, पंचवरन अति सुखकारी,
सुरतरुके पावन चखि ललचावन, अति मृदुतैं भवि भरि थारी।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय कामबाणविध्वंसनाय पुष्पं निर्वपामीति स्वाहा।
अति मिष्ट मनोहर घेवर फेनी, मोदक गूझा भरि थारी,
रसना के रंजन रसके पूरे, क्षुधा निवारन बलकारी।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय क्षुधारोगविनाशनाय नैवेद्यं निर्वपामीति स्वाहा।
दीप रतनमय जोति मनोहर, कनक रकाबी में धारैं,
तम मोह नसै जिम पवन थकी घन, स्वपर लखै गुण विस्तारैं।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय मोहांधकारविनाशनाय दीपं निर्वपामीति स्वाहा।
शुभ धूप दशांग हुताशनके संग, लै धूपायन मांहि भरैं,
तसु सौरभतैं मधु गुंजत आवैं, अष्टकर्म ततकाल जरैं।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय अष्टकर्मदहनाय धूपं निर्वपामीति स्वाहा।
पूंजी दाख बदाम छुहारा, एला श्रीफल जुत ल्यावैं,
भरि कनक थाल में मनके रंजन, मोच्छ महाफल लहु पावैं।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय मोक्षफलप्राप्तये फलं निर्वपामीति स्वाहा।
सलिल सुच्छ मलयगिर चंदन, अछित कुसुम चरु भरि थारी,
मणिदीप दशांग धूप फल उत्तम, अर्घ ‘राम’ करि सुखकारी।
श्रीनेमि जिनेश्वरके पद वंदूं, राजमति सी ततछिन छारी,
पशुवनकी रव सुनिके करुणा धरि, जाय चढ़े प्रभु गिरनारी।
ॐ ह्रीं श्रीनेमिनाथजिनेन्द्राय अनर्घ्यपदप्राप्तये अर्घं निर्वपामीति स्वाहा।
पंचकल्याणक अर्घ
(दोहा)
षष्ठी कार्तिक कृष्ण ही, अपराजित अहमिंद,
चय शिवदेव्या उर लयो, जजूँ चरण गुणवृंद।
ॐ ह्रीं कार्तिककृष्णषष्ठ्यां गर्भमंगलप्राप्ताय श्रीनेमिनाथजिनेन्द्राय अर्घं०
जनमें श्रावण षष्ठि सित, वासव चतुरनिकाय,
स्नपन करि सुर गिरि जजे, मैं जजहूं गुणगाय।
ॐ ह्रीं श्रावणशुक्लषष्ठ्यां जन्ममंगलप्राप्ताय श्रीनेमिनाथजिनेन्द्राय अर्घं०
षष्ठी श्रावण सुकल ही, तजि विवाह सुकुमार,
उर्जयंत गिरि तप धरयो, जजू चरण अवतार।
ॐ ह्रीं श्रावणशुक्लषष्ठ्यां तपोमंगलप्राप्ताय श्रीनेमिनाथजिनेन्द्राय अर्घं०
सुदि अश्विन प्रतिपद हने, घातिकर्म दुखदाय,
घाति कर्म केवल भये, जजूँ चरण गुण गाय।
ॐ ह्रीं आश्विनशुक्लप्रतिपदायां ज्ञानमंगलप्राप्ताय श्रीनेमिनाथजिनेन्द्राय अर्घं०
सकल साढ सप्तमि गये शेष कर्म हनि मोख,
सिव कल्याण सुरपति कर्यो, जजूँ चरण गुणधोख।
ॐ ह्रीं अषाढशुक्लसप्तम्यां मोक्षमंगलप्राप्ताय श्रीनेमिनाथजिनेन्द्राय अर्घं०
जयमाला
(रोला छंद)
लखि अनित्य भव तज्यौ राज तृणवत तप धार्यौ,
करि बहु विधि उपवास सकल आगम विसतार्यौ;
मुनि सुप्रतिष्ठित नमूं भावना षोडस भाये,
करि समाधि अहमिंद भये तीर्थंकर थाये॥१॥
(पद्धरी छंद)
जय समुद्रविजै शिवदेवि माय, श्री नेमि जिनेश्वर गर्भ आय,
तिष्ठे कार्तिक सुदि षष्ठि देव, गर्भहि कल्याण आये स्वमेव॥२॥
हरिवंस व्योम मधि सुष्ठु भान, सित श्रावण षष्ठी जनम थान,
सौरीपुरतैं सुरमेरु लेय, जन्माभिषेक करि गण भनेय॥३॥
जय देव महाबल धरन बाल, द्रह प्रचुर नीर मनु कुसुम माल,
जय धीरधुरंधर मेरु शृंग, अति पावन लावनि सकल अंग॥४॥
जय दोष निराकृत धर्म धोख, भवतारक संभव करन मोख,
जय मोहन मूरति सिष्ट पाल, पितु मात पद्म रवि प्रातकाल॥५॥
बहु नृत्य ठानि पितु मातु देय, जय वृद्ध भये गिन राज हेय,
सित श्रावण षष्ठी जंतु पेखि, भयभीत भये भवतैं विसेखि॥६॥
तप धारि तज्यौ परिग्रह पिसाच, नुति सिद्धोंको करि त्याग वाच,
गहि ध्यान खडग चउघाति मार, लहि केवल शिव प्रतिपद कुआर॥७॥
धन देव रच्यौ समवादिसार, जिन अंतरीक करिकैं विहार,
वन ग्राम नगर पुर सर्वदेश, कहि धर्म भव्य तारे महेश॥८॥
भवकूप इहै अघको भंडार, तिसमैं दुख है सुख ना लगार,
तुम तारण विरद निहारि देव, मैं सरन गही मुझि तारि देव॥९॥
दिन सप्तमि सित आषाढ मोखि, जिन प्रकृति पिचासी शेष सोखि,
गिरनारि शिखर निर्वानथान, चंदराम नमै निति धारि ध्यान॥१०॥
(घत्ता)
इह पंच कल्याने सुरपति ठाने, नरपति खगपति निति ध्यावैं,
जो पढें पढावैं सुर धरि गावैं, तो शिवके सुख लहु पावैं॥११॥
ॐ ह्रीं श्रीनेमिनाथजिनेन्द्राय महार्घं निर्वपामीति स्वाहा।
॥ इति आशीर्वाद॥
स्रोत: प्रतिष्ठा पूजन विधान (सोनगढ़), पृष्ठ ३१ (प्रतिष्ठा पूजन विधान (सोनगढ़) | Pratishtha Pujan Vidhan (Songadh))