श्री अनन्तनाथ पूजन
(छन्द कवित्त)
पुष्पोत्तर तजि नगर अजुध्या जनम लियो सूर्याउर आय।
सिंघसेन नृप के नन्दन, आनन्द अशेष भरे जगराय॥
गुन अनन्त भगवन्त धरे, भवदन्द हरे तुम हे जिनराय।
थापतु हों त्रय बार उचरिकैं, कृपासिन्धु तिष्ठहु इत आय॥
ॐ ह्रीं श्रीअनन्तनाथजिन! अत्र अवतर अवतर संवौषट्।
ॐ ह्रीं श्रीअनन्तनाथजिन! अत्र तिष्ठ तिष्ठ ठः ठः।
ॐ ह्रीं श्रीअनन्तनाथजिन! अत्र मम सन्निहितो भव भव वषट्।
(छन्द गीता तथा हरिगीता)
शुचि नीर निरमल गंगको लैं, कनकभृंग भराइया।
मल करम धोवन हेत मनवचकाय धार ढराइया॥
जगपूज परमपुनीत मीत, अनन्त संत सुहावनों।
शिवकंतवंत महंत ध्यावों, भ्रन्ततंत नशावनों॥
ॐ ह्रीं श्रीअनन्तनाथजिनेन्द्राय जन्मजरामृत्युविनाशनाय जलम् नि० स्वाहा।
हरिचन्द कदलीनन्द कुंकुम, दन्दताप निकन्द है।
सब पापरजसंतापभंजन, आपको लखि चन्द है॥जग०॥
ॐ ह्रीं श्रीअनन्तनाथजिनेन्द्राय भवतापविनाशनाय चन्दनम् नि० स्वाहा।
कनशाल दुति उजियाल हीर, हिमालगुलकनितें घनी।
तसु पुंज तुम पदतर धरत, पद लहत स्वच्छ सुहावनी॥जग०॥
ॐ ह्रीं श्रीअनन्तनाथजिनेन्द्राय अक्षयपदप्राप्तये अक्षतम् नि० स्वाहा।
पुष्कर अमरतर जनित वर, अथवा अवर कर लाइया।
तुम चरनपुष्करतर धरत, सरशूल सकल नशाइया॥जग०॥
ॐ ह्रीं श्रीअनन्तनाथजिनेन्द्राय कामबाणविध्वंसनाय पुष्पम् नि० स्वाहा।
पकवान नैना घ्रानरसना को प्रमोद सुदाय हैं।
सो ल्याय चरन चढ़ाय रोग, छुधाय नाश कराय हैं॥जग०॥
ॐ ह्रीं श्रीअनन्तनाथजिनेन्द्राय क्षुधारोगविनाशनाय नैवेद्यं नि० स्वाहा।
तममोह भानन जानि आनन्द, आनि सरन गही अबै।
वर दीप धारों बारि तुमढिग, सुपरज्ञान जु द्यो सबैं॥जग०॥
ॐ ह्रीं श्रीअनन्तनाथजिनेन्द्राय मोहान्धकारविनाशनाय दीपम् नि० स्वाहा।
यह गन्ध चूरि दशांग सुन्दर, धूम्रध्वज में खेय हों।
वसुकर्म भर्म जराय तुम ढिग, निज सुधातम वेय हों॥जग०॥
ॐ ह्रीं श्रीअनन्तनाथजिनेन्द्राय अष्टकर्मविध्वंसनाय धूपम् नि० स्वाहा।
रसथक्क पक्क सुभक्क चक्क, सुहावनें मृदु पावनें।
फलसार वृन्द अमंद ऐसो, ल्याय पूज रचावनें॥जग०॥
ॐ ह्रीं श्रीअनन्तनाथजिनेन्द्राय मोक्षफलप्राप्तये फलम् नि० स्वाहा।
शुचि नीर चन्दन शालिशंदन, सुमन चरु दीवा धरों।
अरु धूप जुत मैं अरघ करि, करजोरजुग विनति करों॥जग०॥
ॐ ह्रीं श्रीअनन्तनाथजिनेन्द्राय अनर्घ्यपदप्राप्तये अर्घ्यं नि० स्वाहा।
पञ्चकल्याणक
(छन्द सुन्दरी तथा द्रुतविलम्बित)
असित कातिक एकम भावनों, गरभको दिन सो गिन पावनों।
किय सची तित चर्चन चावसों, हम जजें इत आनन्द भावसों॥
ॐ ह्रीं कार्तिक कृष्णैक प्रतिपदायां गर्भमंगलमण्डिताय श्री अनन्तनाथजिनेन्द्राय अर्घ्यं निर्वपामीति स्वाहा।
जनम जेठवदी तिथि द्वादशी, सकल मंगल लोकविषैं लसी।
हरि जजें गिरिराज समाजतें, हम जजें इत आतम लाजतें॥
ॐ ह्रीं ज्येष्ठकृष्णद्वादश्यां जन्ममङ्गलमण्डिताय श्री अनन्तनाथजिनेन्द्राय अर्घ्यं निर्वपामीति स्वाहा।
भवशरीर विनश्वर भाइयो, असित जेठदुवादशि गाइयो।
सकल इन्द्र जजे तित आइकें, हम जजें इत मंगल गाइकें॥
ॐ ह्रीं ज्येष्ठकृष्णद्वादश्यां तपोमङ्गलमण्डिताय श्री अनन्तनाथजिनेन्द्राय अर्घ्यं निर्वपामीति स्वाहा।
असित चैत अमावसको सही, परम केवलज्ञान जग्यो कही।
लही समोसृत धर्म धुरंधरो, हम समर्चत विघ्न सबै हरो॥
ॐ ह्रीं चैत्रकृष्णामावस्यायां ज्ञानमङ्गलमण्डिताय श्री अनन्तनाथजिनेन्द्राय अर्घ्यं निर्वपामीति स्वाहा।
असित चैत अमावस गाइयो, अघतघाति हने शिव पाइयो।
गिर समेद जजे हरि आयकें, हम जजें पद प्रीति लगाइकें॥
ॐ ह्रीं चैत्रकृष्णामावस्यायां मोक्षमङ्गलमण्डिताय श्री अनन्तनाथजिनेन्द्राय अर्घ्यं निर्वपामीति स्वाहा।
जयमाला
(छन्द दोहा)
तुम गुण वरनन येम जिम, खंविहाय करमान।
तथा मेदिनी पदनिकरि, कीनों चहत प्रमान॥
जय अनन्त रवि भव्यमन, जलज वृन्द विहसाय।
सुमति कोक तियथोक सुख, वृद्ध कियो जिनराय॥
(छन्द नयमालनी, चंडी तथा तामरस)
जै अनन्त गुनवंत नमस्ते, शुद्ध ध्येय नित सन्त नमस्ते।
लोकालोक विलोक नमस्ते, चिन्मूरत गुनथोक नमस्ते॥
रत्नत्रयधर धीर नमस्ते, करमशत्रु करि वीर नमस्ते।
चार अनन्त महन्त नमस्ते, जय जय शिवतियकंत नमस्ते॥
पञ्चाचार विचार नमस्ते, पञ्च कर्ण मदार नमस्ते।
पञ्च पराव्रत-चूर नमस्ते, पञ्चमगति सुखपूर नमस्ते॥
पञ्चलब्धि-धरनेश नमस्ते, पञ्च भाव सिद्धेश नमस्ते।
छहों दरव गुनजान नमस्ते, छहों काल पहिचान नमस्ते॥
छहों काय रच्छेश नमस्ते, छह सम्यक् उपदेश नमस्ते।
सप्तविशनवनवह्नी नमस्ते, जय केवल अपरन्हि नमस्ते॥
सप्ततत्व गुनभनन नमस्ते, सप्त शुभ्रगति हनन नमस्ते।
सप्तभंग के ईश नमस्ते, सातों नय कथनीश नमस्ते॥
अष्ट करम मलदल्ल नमस्ते, अष्ट जोग निरशल्ल नमस्ते।
अष्टम धराधिराज नमस्ते, अष्ट गुननिसिरताज नमस्ते॥
जय नवकेवल प्राप्त-नमस्ते, नव पदार्थथिति आप्त नमस्ते।
दशों धरमधरतार नमस्ते, दशों बंधपरिहार नमस्ते॥
विघ्न महीधर विज्जु नमस्ते, जय ऊरधगतिरिज्जु नमस्ते।
तन कनकदुति पूर नमस्ते, इख्वाकज गनसूर नमस्ते॥
धनु पचासतन उच्च नमस्ते, कृपासिधु गुन शुच्च नमस्ते।
सेही अंग निशंक नमस्ते, चितचकोर मृग अंक नमस्ते॥
राग-दोष-मदटार नमस्ते, निजविचार दुखहार नमस्ते।
सुर सुरेश-गन-वृन्द नमस्ते. ‘वृन्द’ करो सुखकन्द नमस्ते॥
(छन्द घत्तानन्द)
जय जय जिनदेवं सुरकृतसेवं, नित कृतचित्त हुल्लासधरं।
आपदउद्धारं समतागारं, वीतराग विज्ञानभरं॥
ॐ ह्रीं श्री अनन्तनाथजिनेन्द्राय महार्घ्यं निर्वपामीति स्वाहा।
(छन्द मदावलिप्तकपोल तथा रोड़क)
जो जन मनवचकाय लाय, जिन जजैं नेह धर।
वा अनुमोदन करैं करावै पढ़ै पाठ वर॥
ताके नित नव होय, सुमंगल आनन्ददाई।
अनुक्रमतैं निरवान, लहै सामग्री पाई॥
पुष्पांजलि क्षिपेत, इत्याशीर्वादः।
रचयिता: कविवर वृन्दावन
स्रोत: बृहज्जिनवाणी संग्रह (चौबीस तीर्थङ्कर पूजन खण्ड), पृष्ठ ३४२ से ३४५