(छंद अशोकपुष्पमंजरी, दण्डक, अर्द्धमंजरी तथा अर्द्धनाराच)
त्याग वैजयंत सार सारधर्मके अधार,
जन्मधार धीर नग्न सुष्टु कौशलापुरी।
अष्टदुष्ट नष्टकार मातु वैजयाकुमार,
आयु पूर्व लक्ष दत्त है बहत्तरैपुरी॥
ते जिनेश श्रीमहेश शत्रुके निकंदनेश,
अत्र हेरिये सुदृष्टि भक्तपै कृपा पुरी।
आय तिष्ठ इष्टदेव मैं करों पदाब्जसेव,
पर्म शर्मदाय पाय आय शर्न आपुरी॥१॥
ॐ ह्रीं श्रीअजितनाथजिन अत्रावतरवावतर। संवौषट्। अत्र तिष्ठ तिष्ठ ठः ठः। अत्र मम सन्निहितो भव भव। वषट्।
(अष्टक)
(छंद त्रिभंगी अनुप्रासक)
गंगाहृदपानी निर्मल आनी, शौरभसानी सीतानी।
तसु धारत धारा तृषानिवारा, शांतागारा सुखदानी॥
श्रीअजितजिनेशं नुतनाकेशं, चक्रधरेशं खगेशं।
मनवांछितदाता त्रिभुवनत्राता, पूजों ख्याता जगेशं॥१॥
ॐ ह्रीं श्रीअजितजिनेन्द्राय जन्ममृत्युविनाशनाय जलं निर्वपामीति स्वाहा।
शुचि चंदन बावन तापमिटावन, सौरभ पावन घसि ल्यायो।
तुम भवतपभंजन हौ शिवरंजन, पूजनरंजन मैं आयो॥
श्रीअजितजिनेशं नुतनाकेशं, चक्रधरेशं खगेशं।
मनवांछितदाता त्रिभुवनत्राता, पूजों ख्याता जगेशं॥२॥
ॐ ह्रीं श्रीअजितजिनेन्द्राय भवातापविनाशनाय चंदनं निर्वपामीति स्वाहा।
सितखंडविवर्जित निशिपतितर्जित, पुञ्ज विधर्जित तंदलको।
भवभावनिखर्जित शिवपदसर्जित, आनंदभर्जित दंदलको॥श्री०
ॐ ह्रीं अजितजिनेन्द्राय अक्षयपदप्राप्तये अक्षतान् निर्वपामीति स्वाहा।
मनमथपदमंथन धीरजग्रंथन, ग्रंथनिग्रंथन ग्रंथपती।
तुमपादकुशेसे आदिकुशेसे, धारि अशेषे अर्चयती॥श्री०॥
ॐ ह्रीं श्रीअजितजिनेन्द्राय कामबाणविध्वंसनाय पुष्पं निर्वपामीति स्वाहा।
आकुलकुलवारन थिरताकारन, क्षुदाविदारन चरु लायो।
षटरसकर भीने ऊब नवीने पूजन कीने सुख पायो॥श्री०॥
ॐ ह्रीं श्रीअजितजिनेन्द्राय क्षुधारोगविनाशनाय चरुं निर्वपामीति स्वाहा।
दीपक मनिमाला जोतउजाला, भरि कनथाला हाथ लिया।
तुम अमृतमहारी शिवसुखकारी, केवलधारी पूज किया॥श्री०॥
ॐ ह्रीं श्रीअजितजिनेन्द्राय मोहान्धकारविनाशनाय दीपं निर्वपामीति स्वाहा।
अगरादिक चूरन परिमलपूरन, खेवत क्रूरन कर्म जरै।
दशहू दिशि धावत हर्षबढ़ावत, अलिगुणगावत नृत्यकरै॥ श्री०
ॐ ह्रीं श्रीअजितजिनेन्द्राय अष्टकर्मदहनाय धूपं निर्वपामि।
बादाम नरङ्गी श्रीफल चंगी आदि अभंगीसों अरचौं।
सब विघ्नविनाशै सुखपरकाशै, आतम भासै भौविरचौं॥श्री०॥
ॐ ह्रीं श्रीअजितजिनेन्द्राय मोक्षफलप्राप्तये फलं निर्वपामि।
जलफल सब सज्जै बाजत बज्जै, गुनगनरज्जै मनमज्जै।
तुअ पदजुगमज्जै सज्जन जज्जै, ते भवभज्जै निजकज्जै॥
श्रीअजितजिनेशं नुतनाकेशं, चक्रधरेशं, खगेशं
मनवांछितदाता त्रिभुवनत्राता, पूजों ख्याता, जगेशं॥६॥
ॐ ह्रीं श्रीअजितजिनेन्द्राय अनर्घ्यपदप्राप्तये अर्घ्यं निर्वपामि।
(पंचकल्याणक)
(छंद द्रुतमध्यकं १६ मात्रा)
जेठ असेत अमावाशि सोहै, गर्भदिना नँद सो मनमोहै।
इंद फनिंद जजें मनलाई, हम पद पूजत अर्घ चढ़ाई॥१॥
ॐ ह्रीं ज्येष्ठकृष्णामावस्यायां गर्भमंगलप्राप्ताय श्रीअजितजिनेन्द्राय अर्घं निर्वपामीति स्वाहा॥१॥
माघसुदी दशमी दिन जाये, त्रिभुवनमें अति हरष बढ़ाये।
इंद फनिंद जजें तित आई, हम नित सेवत हैं हुलसाई॥२॥
ॐ ह्रीं माघशुक्लदशमीदिने जन्ममंगलमंडिताय श्रीअजितजिनेन्द्राय अर्घं निर्वपामीति स्वाहा॥२॥
माघसुदी दशमी तप धारा, भव तन भोग अनित्य विचारा।
इंद फनिंद जजें तित आई, हम इत सेवत हैं सिरनाई॥३॥
ॐ ह्रीं माघशुक्लदशमीदिने दीक्षाकल्याणकप्राप्ताय श्रीअजितजिनेन्द्राय अर्घं निर्वपामीति स्वाहा॥३॥
पौषसुदी तिथि चाथ सुहायो, त्रिभुवनभानु सुकेवल जायो।
इंद फनिंदजजैं तित आई, हम पद पूजत प्रीत लगाई॥४॥
ॐ ह्रीं पौषशुक्लचतुर्थीदिने ज्ञानकल्याणकप्राप्ताय श्रीअजितजिनेन्द्राय अर्घं निर्वपामीति स्वाहा॥४॥
पंचमि चैतसुदी निरवाना, निजगुनराज लियो भगवाना।
इन्द फनिंद जजें तित आई, हम पद पूजत हैं गुनगाई॥५॥
ॐ ह्रीं चैत्रशुक्लपंचमीदिने निर्वाणमंगलप्राप्ताय श्रीअजितनाथाय अर्घं निर्वपामीति स्वाहा॥५॥
(जयमाला)
(दोहा)
अष्ट दुष्टको नष्ट करि, इष्ट मिष्ट निज पाय।
शिष्ट धर्म भाख्यो हमें, पुष्ट करो जिनराय॥१॥
(छन्द पद्धड़ी १६ मात्रा)
जय अजितदेव तुअ गुन अपार, पै कहूं कछुक लघुबुद्धि धार।
दशजनमतअतिशय बलअनंत, शुभलच्छन मधुरवचन अनंत
संहनन प्रथम मलरहित देह, तनसौरभ शोभितस्वेत जेह।
वपु स्वेदविना महरूपधार, समचतुर धरें संठान चार॥३॥
दश केवल गमनअकाशदेव, सुरभिख रहै योजन सतेव।
उपसर्गरहित जिनतन सु होय, सब जीव रहितबाधा सु जोय
मुखचारि सरबविद्याअधीश, कवलाअहारवर्जित गरीश।
छायाबिनु नख कच बढ़ें नाहिं, उन्मेष टमक नहिं भ्रुकुटिमाहिं
सुरकृत दशचार करों बखान, सब जीवमित्रताभाव जान।
कंटकबिन दर्पनवत सुभूम, सब धान वृच्छ फल रहे झूम॥
षटरृतुके फूल फले निहार, दिशि निर्मल जिय आनंदधार।
जहँ शीतल मंद सुगंध वाय, पदपंकजतल पंकज रचाय॥७॥
मलरहित गगन सुर जय उचार, बरषा गंधोदक होत सार।
वर धर्मचक्र आगें चलाय, वसुमंगलजुत यह सुर रचाय॥८॥
सिंहासन छत्र चमर सुहात, भामंडलछवि बरनी न जात।
तरु उच्चअशोक रु सुमनवृष्टि, धुनिदिव्य और दुन्दभी मिष्ट॥
दृगज्ञानशर्मवीरज अनंत, गुण छियालीस इम तुम लहंत।
इन आदि अनंते सुगुनधार, बरनत गनपति नहिं लहत पार
तव समवशारनमहुँ इन्द्र आय, पद पूजत बसुविधि दरब लाय
अति भगतसिहित नाटक रचाय, तायेइ थेइ थेइ धुनि रही छाय
पग नूपुर झननन झनझनाय, तननननननन तन तान गाय।
घननननननन घंटा बजाय, छम छम छम छम घुंघरू बजाय॥
डम डम डम डम डम डमरु ध्वान, संसाग्रदि सरंगीसुर भरत तान
झट झट झट झटपट नटत नाट, इत्यादि रच्यो अद्भुत सुठाट
पुनि बंदि इंद थुति नुति करन्त, तुम हो जगमें जयवंत संत।
फिर तुम विहार करि धर्मवृष्टि, सब जोग निरोष्यो परम इष्ट
सम्मेदथकी लिय मुकति थान, जय सिद्धशिरोमन गुननिधान
वृन्दावन बंदत बारबार, भवसागरतें मो तार तार॥१५॥
(छन्द घत्तानन्द)
जय अजित कृपाला गुनमानमाला, संजमशाला बोधपती।
वर सुजसउजाला हीरहिमाळा, ते अधिकाला स्वच्छ अती॥
ॐ ह्रीं श्रीअजितजिनेन्द्राय पूर्णार्घं निर्वपामि।
(छन्द मदावलिमत्तकपोल)
जो जन अजित जिनेश जजें हैं, मनवचकाई,
ताकों होय अनन्द ज्ञान संपति सुखदाई।
पुत्र मित्र धयधान्य सुजस त्रिभुवनमहँ छावै,
मकल शत्रु छय जाय अनुक्रमसों शिव पावै॥१७॥
(इत्याशीर्वादः)
स्रोत: पूजन रत्नाकर, पृष्ठ १५९ (पूजन रत्नाकर | Pujan Ratnakar)