षोडशकारन सुहृदय
(प्रभाती )
षोडशकारन सुहृदय, धारन कर भाई!
जिनतें जगतारन जिन, होय विश्वराई॥टेक॥
निर्मल श्रद्धान ठान, शंकादिक मल जघान।
देवादिक विनय सरल भावतैं कराई॥१॥
शील निरतिचार धार, मारको सदैव मार।
अंतरंग पूर्ण पूर्ण ज्ञान, रागको विंधाई॥२॥
यथाशक्ति द्वादश तप, तपो शुद्ध मानस कर।
आर्त रौद्र ध्यान त्यागि, धर्म शुक्ल ध्याई॥३॥
जथाशक्ति वैयावृत्त, धार अष्टमान टार।
भक्ति श्रीजिनेन्द्र की सदैव चित्त लाई॥४॥
आरज आचारज के, वंदि पाद - वारिजकों।
भक्ति उपाध्याय की, निधाय सौख्यदाई॥५॥
प्रवचन की भक्ति जतनसेति बुद्धि धरो नित्य।
आवश्यक क्रिया में न, हानि कर कदाई॥६॥
धर्म की प्रभावना सु, शर्मकर बढ़ावना सु।
जिनप्रणीत सूत्रमाहिं, प्रीति कर अघाई॥७॥
ऐसे जो भावत चित, कलुषता बहावत तसु।
चरनकमल ध्यावत बुध, भागचन्द’ गाई॥८॥
रचयिता: कविवर श्री भागचंद जी जैन
Source: आध्यात्मिक भजन संग्रह (प्रकाशक: PTST, जयपुर )