प्रभूजी अष्ट द्रव्यजु ल्यायो भावसों,
प्रभूजी था का हरष हरष गुण गाऊं महाराज।
यो मन हरख्यो प्रभू थांकी पूजा जी रे कारणे॥
प्रभू जी थांकी तो पूजा भवि जन नित करे,
जाका अशुभ कर्म कट जाय महाराज।
यो मन हरख्यो प्रभू थांकी पूजा जी रे कारणे॥१॥
प्रभू जी थांकी तो पूजा भवि जीव जो करे,
सो तो सुरग मुकतिपद पावे महाराज॥२॥
प्रभूजी इन्द्र धरणेन्द्रजी सब मिलि गाय,
प्रभू का गुणां को पार न पाइया।
प्रभूजी ये छो जी अनन्ता जी गुणवान,
थाने तो सुमर्या सकट परिहरै।
प्रभूजी ये छो जी साहब तीनों लोक का
जिनराय मैं छू जी निपट अज्ञानी महाराज।
यो मन हरख्यो प्रभू थाकी पूजा जी रे कारणे॥३॥
प्रभूजी थाका तो रूपजी निरखन कारणे,
सुरपति रचिया छै नयन हजार महाराज।
यो मन हरख्यो प्रभू थाकी पूजा जी रे कारणे॥४॥
प्रभूजी नरक निगोद मे भव भव मैं रुल्यो,
जिनराय सहिया छै दुख अपार महाराज।
यो मन हरख्यो प्रभू थाकी पूजा जी रे कारणे॥५॥
प्रभूजी अब तो शरणोजी थारो मैं लियो,
किस विधि कर पार लगावो महाराज।
यो मन हरख्यो प्रभू थाकी पूजा जी रे कारणे॥६॥
प्रभूजी म्हारो तो मनडो थांमेजी घुल रह्यो,
ज्यों चकरी विच रेशम की डोरी महाराज।
यो मन हरख्यो प्रभू थाकी पूजा जी रे कारणे॥७॥
प्रभूजी तीन लोक में है जिन-बिम्ब,
कृत्रिम अकृत्रिम चैत्यालय पूजस्या महाराज।
यो मन हरख्यो प्रभू थाकी पूजा जी रे कारणे॥८॥
प्रभूजी जल चन्दन अक्षत पुष्प नैवेद,
दीप धूप फल अर्घ चढ़ाऊ महाराज,
जिन चैत्यालय महाराज, सब चैत्यालय जिनराज।
यो मन हरख्यो प्रभू थाकी पूजा जी रे कारणे॥९॥
प्रभूजी अष्ट दरब जु ल्याओ बनाय,
पूजा रचाऊ श्रीभगवान की महाराज॥
यो मन हरख्यो प्रभू थाकी पूजा जी रे कारणे॥१०॥
स्रोत: पूजन पाठ (जिनवाणी संग्रह, सं. नीरज जैन), पृष्ठ ६० (पूजन पाठ (जिनवाणी संग्रह, सं. नीरज जैन) | Pujan Path (Jinvani Sangrah, ed. Neeraj Jain))