सहज अबाध समाध धाम तहाँ
सहज अबाध समाध धाम तहाँ, चेतन सुमति खेलैं होरी॥टेक॥।
निजगुन चंदनमिश्रित सुरभित, निर्मल कुंकुम रस घोरी।
समता पिचकारी अति प्यारी, भर जु चलावत चहुँ ओरी॥१॥
शुभ संवर सुअबीर आडंबर लावत भरभर कर जोरी।
उड़त गुलाल निर्जरा निर्भर, दुखदायक भव थिति टोरी॥२॥
परमानन्द मृदंगादिक धुनि, विमल विरागभावधोरी।
‘भागचन्द’ दृग - ज्ञान - चरनमय, परिनत अनुभव रंग बोरी॥३॥
रचयिता: कविवर श्री भागचंद जी जैन
Source: आध्यात्मिक भजन संग्रह (प्रकाशक: PTST, जयपुर )