साधो छोडौ विषै विकारी, जातैं तोहि महादुख कारी।
जौ जैन धरम कौं ध्यावै, सो आत्मीक सुख पावै॥टेक॥
गज फरस विषै दुख पाया, रस मीन गंध अलि पाया।
लखि दीप सलभ हित कीना, मृग नाद सुनत जिय दीना॥१॥
ये एक एक दुखदायी, तू पंच रमत है भाई।
ऐ कौने सीख बताई, तुम्हरे मन कैसें आई॥२॥
इन माहिं लोभ अधिकाई, यह लोभ कुगति कौ भाई।
सो कुगति माहिं दुख भारी, तू त्यागि विषै मतिधारी॥३॥
ए सेवत सुख से लागै, फिर अन्त प्राण कौ त्यागै।
तातैं एक विषफल कहिये, तीन कौं कैसें करि गहिये॥४॥
तब लौं विषय रस भावै, जब लौं अनुभौ नहिं आवै।
जिन अमृत पान नहिं कीना, तीन और रस भवि चित दीना॥५॥
अब चहत कहा लौं कहिये, कारज कहि चुप है रहिये।
यह लाख बात की एकै, मति गहौ विषै का टेकै॥६॥
जौ तजै विषै की आसा, ‘द्यानत’ पावै सिववासा।
यह सतगुरु सीख बताई, काहूँ विरलै के जिय आई॥७॥
Artist- पं. द्यानतराय जी
खोज: Sadho chordo vishae vikari
मूल पृष्ठ (छवि):