(आर्या)
अट्ठावयम्मि उसहो चंपाए वासुपुज्ज जिणणाहो ।
उज्जंते णेमिजिणो पावाए णिव्वुदो महावीरो ।।१।।
वीसं तु जिणवरिंदा अमरासुरवंदिता धुदकिलेसा ।
सम्मेदे गिरिसिहरे णिव्वाणगया णमो तेसिं ।।२।।
वरदत्तो य बरंगो सायरदत्तो य तारवरणयरे ।
आहुट्ठयकोडीओ णिव्वाणगया णमो तेसिं ।।३।।
णेमिसामि पज्जण्णो संबुकुमारो तहेव अणिरुद्धो ।
बाहत्तरिकोडीओ उज्जंते सत्तसया सिद्धा ।।४।।
रामसुबा वेण्णि जणा लाडणरिंदाण पंचकोडीओ ।
पावागिरिवरसिहरे णिव्वाणगया णमो तेसिं ।।५।।
पंडुसुआ तिण्णिजणा दविडणरिंदाण अट्ठकोडीओ ।
सेत्तुँजयगिरिसिहरे णिव्वाणगया णमो तेसिं ।।६।।
संते जे बलभद्दा जदुवणरिंदाण अट्ठकोडीओ ।
गजपंथे गिरिसिहरे णिव्वाणगया णमो तेसिं ।।७।।
रामहणू सुग्गीओ गवयगवाक्खो य णीलमहाणीलो ।
णवणवदीकोडीओ तुंगीगिरिणिव्वुदे वंदे ।।८।।
णंगाणंगकुमारा कोडीपंचद्धमुणिवरा सहिया ।
सुवणागिरिवरसिहरे णिव्वाणगया णमो तेसिं ।।९।।
दहमुहरायस्स सुवा कोडीपंचद्धमुणिवरा सहिया ।
रेवाउहयतडग्गे णिव्वाणगया णमो तेसिं ।।१०।।
रेवाणइए तीरे पच्छिमभायम्मि सिद्धवरकूडे ।
दो चक्की दह कप्पे जाहुट्ठयकोडिणिव्वुदे वंदे ।।११।।
वड़वाणीवरणयरे दक्खिणभायम्मि चूलगिरिसिहरे ।
इंदजीदकुंभयणो णिव्वाणगया णमो तेसिं ।।१२।।
पावागिरिवरसिहरे सुव्वण्णभद्दाइमुणिवरा चउरो ।
चलणाणईतडग्गे णिव्वाणगया णमो तेसिं ।।१३।।
फलहोडीवरगामे पच्छिमभायम्मि दोणगिरिसिहरे ।
गुरुदत्ताइमुणिंदा णिव्वाणगया णमो तेसिं ।। १४ ।
णायकुमारमुणिंदो बालि महाबाली चेव अज्झेया ।
अट्ठावयगिरिसिहरे णिव्वाणगया णमो तेसिं ।।१५।।
अच्चलपुरवरणयरे ईसाणे भाए मेढगिरिसिहरे ।
आहुट्ठयकोडीओ णिव्वाणगया णमो तेसिं ।।१६।।
वंसत्थल वरणियरे पच्छिमभायम्मि कुन्थुगिरिसिहरे ।
कुलदेसभूसणमुणी णिव्वणाणगया णमो तेसिं ।।१७।।
जसरटरायस्स सुआ पंचसयाइं कलिंगदेसम्मि ।
कोडिसिलाकोडिमुणी णिव्वाणगया णमो तेसिं ।।१८।।
पासस्स समवसणे सहिया वरदत्तमुणिवरा पंच ।
रिस्सिंदे गिरिसिहरे णिव्वाणगया णमो तेसिं ।।१९।।
इच्छामि भंते परिणिव्वाणभत्ति काओसग्गो कओ तस्सालोचेओ
इमम्मि अवसप्पिणीए चउत्थसमयस्स पच्छिमे भागे आहुट्ठयमासहीणे
वासचउक्कम्मि सेस-कालम्मि पावाए णयरीए कत्तियमासस्स
किण्हचउद्दसिए रत्तीए सादीए णखत्ते पच्चूसे भयवदोमहदि महावीरो
वड्ढमाणो सिद्धिगदो तीसुवि लोएसु भवणवासियवाणवितर-जोइसिइ
कप्पवासिय त्ति चउव्विहा देवा सपरिवारा दिव्वेण गंधेण दिव्वेण
पुप्फेण दिव्वेण धुवेण दिव्वेण चुण्णेण दिव्वेण वासेण दिव्वेण ण्हाणेण
णिच्चकालं अच्चंति पुज्जंति वंदंति णमंसंति
परिणिव्वाणतहाकल्लाणपुज्जं करंति अहमवि इहसंतो तत्थ सत्ताइ
णिच्चकालं अंचेमि पूजेमि वंदामि णमंस्सामि परिणिव्वाण
महाकल्लाणपुज्जं करेमि दुक्खक्खओ कम्मक्खओ बोहिलाओ
सुगइगमणं सम्मं समाहिमरणं जिणगुणसंपत्ति होउ मज्झं ।
स्रोत: जैन विधि विधान (सं. पण्डित अभयकुमार जैन, अखिल भारतीय जैन युवा फैडरेशन), पृष्ठ ६६ से ६८