(दोहा)
प्रभु तुम राजा जगतके, हमें देय दुख मोह।
तुम पद पूजा करत हूँ, हम पै करुणा होहि॥१॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवन् अत्रावतर अवतर संवौषट्।
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवन् अत्र तिष्ठ तिष्ठ ठः ठः।
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवन् अत्र मम सन्निहितो भव भव वषट्।
(छंद त्रिभंगी)
बहु तृषा सतायो, अति दुख पायो, तुमपै आयो जल लायो
उत्तम गंगाजल, शुचि अति शीतल, प्रासुक निर्मल गुन गायो
प्रभु अंतरजामी त्रिभुवननामी, सबके स्वामी, दोष हरो।
यह अरज सुनीजै, ढील न कीजै, न्याय करीजै, दया धरो॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यो जन्ममृत्युविनाशनाय जलं निर्वपामीति स्वाहा॥१॥
अघ तपत निरंतर, अगनिपटंतर, मो उरअंतर, खेद करयो
लै बावन चंदन, दाहनिकंदन, तुमपदबंदन, हरष धरयो॥
प्रभु अंतरजामी, त्रिभुवननामी, सबके स्वामी, दोष हरो।
यह अरज सुनीजै, ढील न कीजै, न्याय करीजै दया धरो॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यो भवातापविनाशनाय चन्दनं निर्वपामि॥२॥
औगुन दुखदाता, कह्यो न जाता, मोहि असाता, बहुत करै।
तंदुल गुनमंडित, अमन अखंडित, पूजत पंडित, प्रीति धरै॥
प्रभु अंतरजामी, त्रिभुवननामी, सबके स्वामी, दोष हरो।
यह अरज सुनीजै, ढील न कीजै न्याय करीजै दया धरो॥३॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यो अक्षयपदप्राप्तये अक्षतान् निर्वपामि॥३॥
सुरनर पशुको दल, काम महाबल, बात कहत छल, मोहि लिया
ताके शर लाऊं फूल चढाऊं, भगति बढाऊं, खोल हिया॥
प्रभु अंतरजामी, त्रिभुवननामी, सबके स्वामी, दोष हरो।
यह अरज सुनीजै, ढील न कीजै न्याय करीजै, दया धरो॥४॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यः कामबाणविध्वंसनाय पुष्पं निर्वपामीति स्वाहा॥४॥
सब दोशनमाहीं, जासम नाहीं, भूख सदा ही मो लागै।
सद् घेवर बावर, लाडू बहुधर, थार कनकभर, तुम आगै॥
प्रभु अन्तरजामी, त्रिभुवननामी, सबके स्वामी दोष हरो।
यह अरज सुनीजै, ढील न कीजै, न्याय करीजै, दया धरो॥५॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यः क्षुधारोगविनाशनाय नैवेद्यं निर्वपामीति स्वाहा॥५॥
अज्ञान महातम, छाय रह्यो मम, ज्ञान दृग्यो हन, दुख पावैं।
तम मेटनहारा, तेज अपारा, दीप सँवारा, जस गावैं॥
प्रभु अन्तरजामी, त्रिभुवननामी, सबके स्वामी, दोष हरो।
यह अरज सुनीजै, ढील न कीजै न्याय करीजै, दया धगे॥६॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यो मोहान्धकारविनाशनाय दीपं निर्वपामीति स्वाहा॥६॥
इक कर्म महावन, भूल रह्यो जन शिवमारग नहिं पावत है।
कृष्णागरुधूपं, अमलअनूपं, नित्यस्वरूपं, ध्यावत है॥
प्रभु अंतरजामी, त्रिभुवननामी, सबके स्वामी, दोष हरा।
यह अरज सुनीजै, ढील न कीजै न्याय करीजै, दया धरो॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्योऽष्टकर्मदहनाय धूपं निर्वपामीति स्वाहा।
सबर्तै जोरावर, अंतराय अरि, सुफल विघ्नकरि डारत है।
फलपुंज विविधभर, नयन मनोहर, श्रीजिनवरपद धारत है॥
प्रभु अन्तरजामी, त्रिभुवननामी, सबके स्वामी, दोष करो।
यह अरज सुनीजै, ढील न कीजै, न्याय करीजै, दया धरो॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्यो मोक्षफलप्राप्तये फलं निर्वपामीति स्वाहा।
आठों दुखदानी, आठनिंसानी, तुम ढिग आनी, दारन हो।
दीनननिस्तारन, अघमउधारन, ‘द्यानत’ तारन कारन हो॥
प्रभु अन्तरजामी, त्रिभुवननामी, सबके स्वामी, दोष हरो।
यह अरज सुनीजै, ढील न कीजै, न्याय करीजै, दया धरो॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिनेन्द्र-
भगवद्भ्योऽनर्घपदप्राप्तये अर्घ्यं निर्वपामीति स्वाहा।
जयमाला।
(दोहा)
गुण अनंत को कहि सकै, छियालीस जिनराय।
प्रगट सुगुन गिनती कहूं, तुम हो होहु सहाय॥१॥
(छंद चौपाई १६ मात्रा)
एक ज्ञान केवल जिन स्वामी, दो आगम अध्यातम नामी।
तीन काल विधि परगट जानी, चार अनंत चतुष्टय ज्ञानी॥२॥
पंच परावर्त्तन परकासी, छहों दरब गुन परजय भासी।
सातभंग वानी परकाशक, आठों कर्म महारिपु नाशक॥३॥
नव तत्त्वनके भावनहारे, दश लच्छनसों भविजन तारे।
ग्यारह प्रतिमाके उपदेशी, बारह सभा मुखी अकलेशी॥४॥
तेरहविध चारितके दाता, चौदह मारगनाके ज्ञाता।
पंद्रह भेद प्रमादनिवारी, सोलह भावन फल अविकारी॥५॥
तारे सत्रह अंक भरत मुव, ठारै थान दान दाता तुव।
भाष उनीस जु कहे प्रथमगुन, बीस अंक गणधरजीकी धुन॥
इक्कइस सर्व घातविध जानै, बाइस बंध नवम गुणथानै।
तेइस निधि अरु रतन नरेश्वर, सो पूजैं चौबीस जिनेश्वर॥
पच्चीस कषाय जु नाश करी हैं, देशघाति छब्बीस हरी हैं।
तत्त्व दरब सत्ताइस देखें, मति विज्ञान अठाइस पेखें॥७॥
उनतिस अक मनुष सब जाने, तीस कुलाचल सर्व बखाने।
इकतिस पटल सुधर्म निहारे, बत्तिस दोष समाइक टारे॥८॥
तेतिस सागर सुखकर आये, चौतिस भेद अलब्धि बताये।
पैंतिस अच्छर जप सुखदाई, छत्तिस कारन नीति मिटाई॥
सैंतिस मग कहि ग्यारह गुनमें, अठतिस पद लहि नरक अघुनमें
उनतालीस उदीरन तरम, चालिस भवन इंद्र पूजैं नम॥
इकतालीस भेद आराधन, उदै बियालिस तीर्थंकर भन।
तेतालीस बंध ज्ञाता नहिं, द्वार चवालिस नर चौथेमहि॥
पैंतालीस पल्यके अच्छर, छियालीस बिन दोष मुनीश्वर।
नरक उदै न छियालिस मुनिधुन, प्रकृतिछियालिस नाश दशमगुन
छियालीसमघन राजु सात भुब, अंक छियालिस सरसों कहि कुब
भेद छियालिस अंतर तपवर, छियालीस पूरन गुन जिनवर॥
(अडिल्ल)
मिथ्या तपत निवारन चंद समान हो,
मोहतिमिर कारनको कारन भान हो।
काल कषाय मिटावन मेघ मुनीश हा,
‘द्यानत’ सम्यक रतनत्रय गुनईश हो॥११॥
ॐ ह्रीं अष्टादशदोषरहितषट्चत्वारिंशद्गुणसहितश्रीजिने-
न्द्रभगवद्भ्यो अर्घ्यं निर्वपामीति स्वाहा।
स्रोत: पूजन रत्नाकर, पृष्ठ ४१४ (पूजन रत्नाकर | Pujan Ratnakar)