देखो भाई महाविकल संसारी।
दुखित अनादि मोह के कारन, राग द्वेष भ्रम भारी॥टेक॥
हिंसारंभ करत सुख समझै, मृषा बोलि चतुराई।
परधन हरत समर्थ कहावै, परिग्रह बढ़त बड़ाई॥१॥
वचन राख काया दृढ़ राखै, मिटे न मन चपलाई।
यातैं होत और की औरें, शुभ करनी दुःख दाई॥२॥
जोगासन करि कर्म निरोधै, आतम दृष्टि न जागे।
कथनी कथत महंत कहावै, ममता मूल न त्यागै॥३॥
आगम वेद सिद्धांत पाठ सुनि, हिये आठ मद आनै।
जाति लाभ कुल बल तप विद्या, प्रभुता रूप बखानै॥४॥
जड सौं राचि परम पद साधै, आतम शक्ति न सूझै।
बिना विवेक विचार दरब के, गुण परजाय न बूझै॥५॥
जस वाले जस सुनि संतोषै, तप वाले तन सोपैं।
गुन वाले परगुन को दोषैं, मतवाले मत पोषैं॥६॥
गुरु उपदेश सहज उदयागति, मोह विकलता छूटै।
कहत ‘बनारसि’ है करुनारसि, अलख अखय निधि लूटै॥७॥
Artist - पं. श्री बनारसीदासजी
मूल पृष्ठ (छवि):