(शार्दुलविक्रीडित)
संसारव्यसनाहतिप्रचलिता नित्योदयप्रार्थिनः
प्रत्यासन्नविमुक्तयः सुमतयः शांतैनसः प्राणिनः ।
मोक्षस्यैव कृतं विशालमतुलं सोपानमुच्चैस्तरा-
मारोहंतु चरित्रमुत्तममिदं जैनेंद्रमोजस्विनः ।।१।।
(अनुष्टुप)
तिलोए सव्वजीवाणं हियं धम्मोवदेसणं ।
वड्ढमाणं महावीरं बंदित्ता सव्ववेदिनं ।।२।।
घाइकम्मविघातत्थं घाइकम्मविणासिणा ।
भासियं भव्वजीवाणं चारित्तं पंचभेददो ।।३।।
सामायियं तु चारित्तं छेदोवड्ढावणं तहा ।
तं परिहारविसुद्धिं च संयमं सुहमं पुणो ।।४।।
जहाखायं तु चारित्तं तहाखायं तु तं पुणे ।
किच्चाहं पंचहाचार मंगलं मलसोहणं ।।५।।
अहिंसादीणि वुत्तानि महव्वयाणि पंच य ।
समिदीओ तदो पंच पंचइंदियणिग्गहो ।।६।।
छब्भेयावासभूसिज्जा अण्हाणत्तमचेलदा ।
लोयत्तं ठिदिभुत्तिं च अदंतवणमेव च ।।७।।
एयभत्तेण संजुत्ता रिसिमूलगुणा तहा ।
दसधम्मा तिगुत्तीओ सीलाणि सयलाणि च ।।८।।
सव्वे विय परीसहा वुत्तुत्तरगुणा तहा ।
अण्णे वि भासिया संता तेसिंहाणीमयेकया ।।९।।
जइ रागेण दोसेण मोहेण णदरेण वा ।
वंदित्ता सव्वसिद्धाणं सजुहा सामुमुक्खुण ।।१०।।
संजदेण मए सम्मं सव्वसंजमभाविणा ।
सव्वसंजमसिद्धीओ लब्भदे मुत्तिजं सुहं ।।११।।
धम्मो मंगलमुक्किट्ठं अहिंसासंजमो तओ ।
देवा वितस्स पणमंति जस्स धम्मे सया मणो ।।१२।।
इच्छामि भंते चारित्तभत्ति काओसग्गो कओ तस्सालोचेओ सम्मणाणजोयस्स सम्मत्ताहिट्ठियस्स सव्वपहाणस्स णिव्वाणमग्गस्स संजमस्स कम्मणिज्जरफलस्स खमाहरस्स पंचमहव्वयसंपण्णस्स तिगुत्तित्तस्स पंचसमिदिजुत्तस्स णाणज्झाणसाहणस्स समयाइपवेसयस्स सम्मचरित्तस्स सदाणिच्चकालं अंचेमि पूजमि बंदामि णमसामि दुक्खक्खओ कम्मक्खओ वोहिलाओ सुगइगमणं समाहिमरणं जिणगुणसंपत्ति होउ मज्झं ।
स्रोत: जैन विधि विधान (सं. पण्डित अभयकुमार जैन, अखिल भारतीय जैन युवा फैडरेशन), पृष्ठ ६२ से ६३