(आर्या)
देसकुलजाइसुद्धा विसुद्धमणवयणकायसंजुत्ता ।
तुम्हं पायपयोरुहमिह मंगलत्थि मे णिच्चं ।।१।।
सगपरसमयविदूए आगमहेदूहि चावि जाणित्ता ।
सुसमच्छा जिणवयणे विणएसुताणुरूवेण ।।२।।
बालगुरुबुड्ढसेहे गिलाणथेरेयखमणसंजुत्ता ।
अट्ठावयग्गअण्णे दुस्सीले चावि जाणित्ता ।।३।।
वयसमिदिगुत्तिजुत्ता मुत्तिपहे ठावया पुणो अण्णे ।
अज्झावयगुणणिलया साहुगुणेणावि संजुत्ता ।।४।।
उत्तमखमाइपुढवी पसण्णभावेण अच्छजलसरिसा ।
कम्मिघणदहणादो अगणी वाऊ असंगादो ।।५।।
गयणमिव णिरुवलेवा अक्खोहा सायरुव्व मुनिवसहा ।
एरिसगुणणिलयाणं पायं पणमामि सुद्धमणो ।।६।।
संसारकाणणे पुण वंभममाणेहि भव्वजीवेहिं ।
णिव्वाणस्स दु मग्गो लद्धो तुम्हं पसाएण ।।७।।
अविसुद्धलेसरहिया विसुद्धलेसेहिं परिणदा सुद्धा ।
रुद्दट्ठे पुणचत्ता धम्मे सुक्के य संजुत्ता ।।८।।
ओग्गहईहावायाधारणगुणसम्पएहिं संजुत्ता ।
सुत्तत्थभावणाए भावियमाणेहि वंदामि ।।९।।
तुम्हे गुणगणसंथुदि अयाणमाणेण जं मए वुत्ता ।
दिंतु मम बोहिलाहं गुरुभत्तिजुदत्थओ णिच्चं ।।१०।।
इच्छामि भंते आइरियभत्ति काओसग्गो कओ तस्सालोचेओ सम्मणाण-सम्मदंसण-सम्मचरित्तजुत्ताणं पंचविहाचाराणं आयरियाणं आयारादिसुदणाणोवदेसणाणं उवज्झायाणं तिरयणगुणपालणरयाणं सव्वसाहूणं णिच्चकालं अच्चेमि पूजेमि वंदामि णमस्सामि दुक्खक्खओ कम्मक्खओ बोहिलाओ सुगइगमणं समाहिमरणं जिणगुण-सम्पत्ति होउ मज्झं ।
स्रोत: जैन विधि विधान (सं. पण्डित अभयकुमार जैन, अखिल भारतीय जैन युवा फैडरेशन), पृष्ठ ६३ से ६४
खोज: Acharya Bhakti