अथ समुद्घातस्वरूप लिख्यते ।
दोहा
चरन जुगल जिनदेवके, वंदत हों कर जोर ॥
जिहँ प्रसाद निजसंपदा, लहै कर्म दल मोर ॥ १ ॥
समुद्घात जे सात हैं, तिनको कछु विस्तार ॥
कहूं जिनागम शाखतें, जिय परदेश विचार ॥ २॥
उदयकषाय प्रचंड ह्वै, निकसत जियपरदेश |
दमि दुर्जनकी देहको, बहुरि न करत प्रवेश ॥ ३ ॥
रोगादिक संयोगसों, औषध परसन काज ॥
निकश जाय परदेश जो, आवत करै इलाज ॥ ४॥
केवल ज्ञानी आत्मा, लोक हद्दलों जाय ॥
परदेशन पूरित करै, उदै न कछू बसाय ॥ ५ ॥
मरन समय जिहँ जीवको समुदघात थित होय ॥
प्रथम परस गति आयकें, बहुर जात है सोय ॥ ६ ॥
षष्टम गुण थानीनको, उपजै कहुं संदेह ॥
प्रश्न करत जिनदेवको, निकसत अद्भुत देह ॥ ७ ॥
सुर मनुष्य कर वैक्रिया, नाना ठौर रमाहिं ॥
सब थानक परदेशजिय, निकसै आवै जाहिं ॥ ८ ॥
तैजस वपु मुनिरायके, निकसत उभय प्रकार ॥
अशुभ शुभन के काजको समुदघात तिहँ बार ॥ ९ ॥
तंतू सब लागे रहैं, सुख दुख बेवे आप ||
देहादिकके प्रसरते, परदेशनिमें व्याप ॥ १० ॥
‘भैया’ बात अगम्य है, कहन सुननकी नाहिं ॥
जानत हैं जिन केवली, जे लच्छन जिय पाहिं ॥ ११ ॥
इति समुद्घात स्वरूप
रचयिता: पंडित श्री " भैया भगवतीदास जी"
Source: ब्रह्म विलास