प्रथम नमौं अरहंतानं, दुतिय नमौं सिद्धानं जी।
त्रितिय नमौं आइरियानं, नमौं उवज्झायानं जी॥
पंच नमौं लोए सव्व, साहूनं गुन गाऊं जी।
चारौं मंगल अरहंत, सिद्ध साधु धर्म ध्याऊं जी॥१॥
चारौं उत्तम लोकमैं, जिन सिद्ध साधु सुधर्म जी।
चारौं सरन गहौ जिनवर, सिद्ध साध धर्म पर्म जी॥
वृषभ चंदप्रभ सांतजिनं, वर्धमान मन वंदौं जी।
हुई होहिंगी चौवीसी, सव नमि पाप निकंदौं जी॥२॥
श्रीजिनवचन सुहावने, स्याद्वाद अविरुद्धं जी।
तीन भवनमैं दीपक वंदौं, त्रिकरण सुद्धं जी॥
प्रतिमा श्रीभगवंतकी, स्वर्ग मर्त्य पातालं जी।
कृत्य अकृत्य दुभेदसौं, वंदन करौं त्रिकालं जी॥३॥
पूरव पाप जु मैं कियो, कृत कारन अनुमोदं जी।
मन वच काय त्रिभेदसौं, सब मिथ्या होदं (१) जी॥
आगैं पाप जु होयगौ, उनंचास विध नासौं जी।
वर्तमान अघ छै करौ, तुम आगैं परकासौ जी॥४॥
सर्व जीवसौं मित्रता, गुनी देखि हरखाऊं जी।
दीन दया सठसौं समता, चारों भावन भाऊं जी॥
प्रभु पूजूं जुग भेदसौं, गुरुपदपंकज सेऊं जी।
आगम अभ्यासौं सदा, रतनत्रै नित वेऊं जी॥५॥
अच्छर मात्र अरथ अनमिल, भूलि कह्यौ सु खिमाऊं जी।
प्रात दोपहर सांझकौ, अर्ध रात्रमैं भाऊं जी॥
द्यानत दीनदयालनौ, भौ भौ भगति सु दीजै जी।
अंत समाधिमरन करौं, राग विरोध हरीजै जी॥६॥
इति आलोचनापाठ।
रचयिता: पंडित श्री द्यानतरायजी
सोर्स: धर्मविलास
खोज: Alochna path